ഐ.എം.എയുടെ തരംഗ യാത്ര കോഴിക്കോട്ട്​

കോഴിക്കോട്​: ഐ.എം.എ പ്രവർത്തനങ്ങളും മറ്റ്​ വിവിധ വിഷയങ്ങളും സർക്കാറിനെയും ജനങ്ങളെയും ബോധിപ്പിക്കുന്നതിന് സംസ്ഥാന പ്രസിഡന്‍റ്​ ഡോ. സാമുവൽ കോശിയുടെ നേതൃത്വത്തിൽ സംസ്ഥാന യാത്ര നടത്തും. തരംഗം എന്ന്​ പേരിട്ട ബോധവത്കരണ യാത്ര മാർച്ച്​ 15ന്​ കാസർകോടു നിന്ന്​ ആരംഭിച്ചതാണെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. ആശുപത്രികളിൽ ഡോക്ടർമാർ നിരന്തരം കൈ​യേറ്റത്തിന്​ വിധേയരാവുകയാണ്​. ഈ സാഹചര്യത്തിൽ ആശുപത്രികളെ സുരക്ഷിതകേന്ദ്രങ്ങളായി പ്രഖ്യാപിക്കണം, ചെറുകിട ആശുപത്രികളെ സംരക്ഷിക്കുന്നതിന് ക്ലിനിക്കൽ എസ്റ്റാബ്ലിഷ്‌മെന്റ് നിയമം ഭേദഗതി ചെയ്യണം, അശാസ്ത്രീയ സങ്കര ചികിത്സാരീതി അടിച്ചേൽപിക്കരുത്, എം.ബി.ബി.എസ് യോഗ്യതയില്ലാത്തവർക്കും ആധുനിക വൈദ്യശാസ്ത്രം കൈകാര്യം ചെയ്യാനനുവദിക്കുന്ന ബ്രിഡ്ജ് കോഴ്‌സുകൾ ഒഴിവാക്കണം എന്നീ കാര്യങ്ങൾ ഉന്നയിച്ചാണ് യാത്ര സംഘടിപ്പിക്കുന്നത്​. യാത്രയിൽ ഓരോ ജില്ലയിലെയും പ്രധാന ആശുപത്രികൾ സന്ദർശിക്കുകയും പ്രശ്നങ്ങൾ പഠിക്കുകയും ചെയ്യുന്നുണ്ടെന്നും ഭാരവാഹികൾ പറഞ്ഞു. ജനങ്ങൾക്ക്​ ഡോക്ടർമാരെ കുറിച്ച്​ പരാതികളുണ്ടെങ്കിൽ ഐ.എം.എയെ അറിയിക്കാം. അതത്​ ജില്ല ഭാരവാഹികളെ അറിയിച്ചാൽ മതിയാകും. അവർ പരാതി എത്തിക്സ്​ കമ്മിറ്റിക്ക്​ കൈമാറുകയും കമ്മിറ്റി പരാതി പരിശോധിച്ച്​ നടപടി സ്വീകരിക്കുകയും ചെയ്യുമെന്ന്​ ഭാരവാഹികൾ പറഞ്ഞു. ഐ.എം.എ സംസ്ഥാന പ്രസിഡന്‍റ്​ ഡോ. സാമുവൽ കോശി, സെക്രട്ടറി ഡോ. ജോസഫ്​ ബെനവൻ, ജില്ല പ്രസിഡന്‍റ്​ ഡോ. വേണുഗോപാൽ, ഡോ. ശങ്കർ മഹാദേവൻ, ഡോ. നാരായണൻ, ഡോ. സി.കെ. ഷാജി, ഡോ. അനീൻ കുട്ടി എന്നിവർ വാർത്തസമ്മേളനത്തിൽ പ​ങ്കെടുത്തു.