വളയം ഗ്രാമപഞ്ചായത്തിന് ആദരവ് നാളെ

നാദാപുരം: ജില്ലയിലെ മികച്ച ഗ്രാമ പഞ്ചായത്തിനുള്ള സ്വരാജ് ട്രോഫി രണ്ടാം തവണയും നേടിയ വളയം ഗ്രാമ പഞ്ചായത്തിനുള്ള പൗരാവലിയുടെ ആദരവ് ഞായറാഴ്ച മൂന്നിന് നടക്കുമെന്ന് സ്വാഗതസംഘം ഭാരവാഹികൾ പറഞ്ഞു. മന്ത്രി മുഹമ്മദ് റിയാസ് പരിപാടി ഉദ്ഘാടനം ചെയ്യും. ഇ.കെ വിജയൻ എം.എൽ.എ അധ്യക്ഷത വഹിക്കും. ജില്ല പഞ്ചായത്ത് പ്രസിഡന്റ് ഷീജ ശശി മുഖ്യാതിഥിയാവും. പഞ്ചായത്ത് പൗരാവകാശരേഖ മുൻ ജില്ല പഞ്ചായത്ത് പ്രസിഡന്റ് പി. മോഹനൻ പ്രകാശനം ചെയ്യും. രാഷ്ട്രപതിയുടെ പുരസ്കാരം നേടിയ മയൂഖയെ ബ്ലോക്ക് പഞ്ചായത്ത് പ്രസിഡന്റ് കെ.പി. വനജ ആദരിക്കും. ഘോഷയാത്ര, അനുമോദന സമ്മേളനം, കലാപരിപാടികൾ എന്നിവ നടക്കും. വാർത്തസമ്മേളനത്തിൽ പി.പി. ചാത്തു, കെ. ചന്ദ്രൻ, സി.വി. കുഞ്ഞബ്ദുല്ല, സി.എച്ച്. ശങ്കരൻ എന്നിവർ പങ്കെടുത്തു.