ഉദയം വീട്​ ഒരുങ്ങുന്നു

കോഴിക്കോട്​: നഗരത്തിലും പരിസരങ്ങളിലും വിവിധ കാരണങ്ങളാൽ തെരുവിൽ കഴിയുന്നവരെ പുനരധിവസിപ്പിക്കുന്ന പദ്ധതിക്ക്​ രണ്ടു​ വയസ്സ്​ തികയുന്നു. കോവിഡ്​ ഒന്നാംതരംഗത്തെ തുടർന്ന്​ ലോക്​ഡൗൺ പ്രഖ്യാപിച്ചപ്പോഴാണ്​ 'ഉദയം' എന്ന പേരിലുള്ള പുനരധിവാസ പദ്ധതി തുടങ്ങിയത്​. അന്നത്തെ ജില്ല കലക്ടറായിരുന്ന എസ്​. സാംബശിവ റാവുവായിരുന്നു ശ്രദ്ധേയമായ ഈ പദ്ധതിക്ക് തുടക്കമിട്ടത്. 'തെരുവുജീവിതങ്ങൾ ഇല്ലാത്ത കോഴിക്കോട്' എന്ന ആശയത്തിലുള്ള പദ്ധതിയിൽ ആയിരത്തിലേറെ പേരെ പുനരധിവസിപ്പിച്ചു. ചേവായൂരിലും വെള്ളിമാട്കുന്നിലും മാങ്കാവിലുമാണ്​ നിലവിൽ ഉദയം ഹോമുകളുള്ളത്​. നാലാമത്തെ ഉദയം ഹോം വെള്ളയിൽ ബീച്ചിൽ സമുദ്ര ഓഡിറ്റോറിയത്തിനു സമീപം ഒരുങ്ങുന്നുണ്ട്​. ഉദ്​ഘാടനം വരുംദിവസങ്ങളിലുണ്ടാകും.