ലോക്കൽ ട്രെയിൻ പുനഃസ്ഥാപിച്ചില്ല; ജോലിക്ക്​ പോകാനാവാതെ നിത്യയാത്രികർ

കോഴിക്കോട്​: തൃശൂർ-കണ്ണൂർ, കോ​ഴിക്കോട്​ -കോയമ്പത്തൂർ പാസഞ്ചർ ട്രെയിനുകൾ പുനഃസ്ഥാപിക്കാത്തത്​ നിത്യയാത്രികർക്ക്​ തൊഴിൽ പ്രതിസന്ധിക്ക്​ കാരണമാവുന്നു. തൃശൂരിനും കോഴിക്കോടിനുമിടയിലുള്ള യാത്രികരാണ്​ കൂടുതൽ പ്രയാസമനുഭവിക്കുന്നത്​. ലോക്​ഡൗൺ കാലത്ത്​ നിർത്തിയ മിക്ക ട്രെയിനുകളും പുനഃസ്ഥാപിച്ചെങ്കിലും മലബാറിലെ സാധാരണക്കാരുടെ ജീവിതവുമായി അഭേദ്യമായി ബന്ധപ്പെട്ട ട്രെയിനുകൾ തിരിച്ചുവന്നില്ല​. ചുരുങ്ങിയ ചെലവിൽ യാത്ര ചെയ്ത്​ തൊഴിലെടുത്തിരുന്ന വനിതകളുൾപ്പെടെ നിരവധി പേർ ട്രെയിൻ ഇല്ലാത്തതിന്‍റെ പേരിൽ ജോലി തന്നെ ഉപേക്ഷിക്കേണ്ടി വന്നു. ഷൊർണൂരിനും കോഴിക്കോടിനുമിടയിലുള്ള യാത്രികരാണ്​ ഏറെ പ്രയാസമനുഭവിക്കുന്നത്​. തൃശൂരിൽ നിന്ന്​ രാവിലെ ആറു മണിക്ക്​ പുറപ്പെട്ട്​ 9.30ന്​ കോഴിക്കോടും 11.30 ഓടെ കണ്ണൂരിലുമെത്തുന്ന ട്രെയിൻ നിത്യതൊഴിലിനടക്കം പോകുന്ന നിരവധിയാളുകൾ യാത്രക്ക്​ ആശ്രയിച്ചിരുന്നു. കോഴി​ക്കോടിനും ഷൊർണൂരിനുമിടയിൽ യാത്ര ചെയ്യുന്ന ജോലിക്കാർക്കും ഉദ്യോഗസ്ഥർക്കും സൗകര്യപ്രദമായ സമയമായിരുന്നു ഈ ട്രെയിനിന്റേ​ത്​. പുലർച്ചെ അഞ്ചിന് കോഴിക്കോട്​ നിന്ന്​ പുറപ്പെട്ട്​ 11.30 ഓടെ കോയമ്പത്തൂരിലെത്തുന്ന ലോക്കൽ ട്രെയിനും നിത്യയാത്രക്കാർക്ക്​ ഉപകാരമുള്ള സമയത്താണ്​. കോവിഡ്​ നിയന്ത്രണങ്ങൾക്കു​ ശേഷം എക്സ്​പ്രസ്​ വണ്ടികളിൽ ജനറൽ കമ്പാർട്ട്​മെന്‍റുകൾ അനുവദിച്ചു തുടങ്ങിയിട്ടും മംഗലാപുരം-തിരുവനന്തപുരം 16348 ട്രെയിനിലും കണ്ണൂർ -ബംഗളൂരു യശ്വന്ത്​പുർ ട്രെയിനിലും മംഗലാപുരം-ചെന്നൈ എഗ് മോര്‍ ട്രെയിനിലും ജനറൽ കമ്പാർട്ടു​മെന്‍റുകൾ പുനഃസ്ഥാപിച്ചിട്ടില്ല. ഇത്​ ഏറ്റവും കൂടുതൽ ബാധിക്കുന്നത്​ മലബാറിലെ യാത്രക്കാരെയാണ്​. പ്രത്യേകിച്ച് സ്ഥിരം യാത്രക്കാരെ. ഇപ്പോൾ സർവിസ് നടത്തുന്ന എല്ലാ ട്രെയിനുകൾക്കും ഓർഡിനറി ടിക്കറ്റും സീസൺ ടിക്കറ്റും അനുവദിക്കുകയാണെങ്കിൽ വിദ്യാർഥികൾ, സർക്കാർ ജീവനക്കാർ, പൊതുമേഖല സ്ഥാപനങ്ങളിലെ ജീവനക്കാർ, കോഴി​ക്കോട്​ മെഡി. കോളജിൽ പോകുന്ന രോഗികൾ തുടങ്ങിയവർക്കെല്ലാം പ്രയോജനകരമാകും. മലബാറിലെ ജനപ്രതിനിധികളും കേരളത്തിന്‍റെ റെയിൽവേ ചുമതലയുള്ള ​ മന്ത്രിയും വിഷയത്തിൽ ഇടപെടണമെന്നാണ്​ യാത്രികരുടെ ആവശ്യം. പി. ഷംസുദ്ദീൻ