മണന്തലക്കടവ്, കുറ്റിക്കടവ് പാലങ്ങൾക്ക് ഒരുകോടി വീതം

മാവൂർ: മാവൂർ മണന്തലക്കടവ് പാലം, കുറ്റിക്കടവ് പാലം എന്നിവക്ക് സ്ഥലമേറ്റെടുക്കാൻ ബജറ്റിൽ ഒരുകോടി രൂപ വീതം വകയിരുത്തിയതായി പി.ടി.എ. റഹീം എം.എൽ.എ അറിയിച്ചു. ചാലിയാറിനു കുറുകെ മണന്തലക്കടവിൽ മാവൂരിനെയും വാഴക്കാടിനെയും ബന്ധിപ്പിച്ച് പാലം പണിയാനാണ് പദ്ധതി. കുറ്റിക്കടവിൽ ചെറുപുഴക്ക് കുറുകെ വീതി കുറഞ്ഞ പാലമാണുള്ളത്. കുറ്റിക്കടവിനെയും കണ്ണിപ്പറമ്പിനെയും ബന്ധിപ്പിച്ച് ഇവിടെ വലിയ പാലം പണിയണമെന്നത് നേരത്തെയുള്ള ആവശ്യമാണ്. മാവൂരിലെ നിർദിഷ്ട മിനി സിവിൽ സ്റ്റേഷൻ നിർമിക്കാനും തുക വകയിരുത്തി. പാറമ്മലിൽ നിലവിലെ വില്ലേജ് ഓഫിസ് സ്ഥിതിചെയ്യുന്ന ഭൂമിയിലാണ് മിനി സിവിൽ സ്റ്റേഷൻ വരുന്നത്. എട്ടു കോടിയാണ് പദ്ധതിയുടെ എസ്റ്റിമേറ്റ്.