കിൻഫ്ര നോളജ്​ പാർക്ക്​: നഷ്ടപരിഹാരത്തിനായി സർക്കാർ വാഹനങ്ങൾ ലേലംചെയ്തു

കോഴി​ക്കോട്​: രാമനാട്ടുകരയിൽ കിൻഫ്ര നോളജ്​ പാർക്കിന്​ സ്​ഥലം ഏ​റ്റെടുത്തതിൽ പൂർണമായും നഷ്ടപരിഹാരം നൽകാത്തതിനെ തുടർന്ന്​ ജപ്തിചെയ്ത സർക്കാർ വാഹനങ്ങൾ ലേലത്തിൽ വിറ്റു. ജില്ല കലക്ടറു​ടെ കീഴിലുള്ള കെ.എൽ 11 എ.ഇസഡ്​ 8888 നമ്പർ ഫോർഡ്​ ഫിഗോ കാറും കൃഷിവകുപ്പിന്‍റെ കെ.എൽ 11ബി.ഇ 3774 നമ്പർ ബൊലേറോയുമാണ്​ ലേലം ചെയ്തത്​. അഡ്വ. രത്നകുമാർ മല്ലിശ്ശേരി മുഖേന വടക്കേവീട്ടിൽ ബാവ നൽകിയ ഹരജിയിലാണ്​ വാഹനങ്ങൾ ലേലം ​ചെയ്യാൻ പ്രിൻസിപ്പൽ സബ്​ ജഡ്ജ്​ കെ. പ്രിയ നേരത്തേ ഉത്തരവിട്ടത്​. 40.86 ലക്ഷം രൂപ ഈടാക്കാനാണ്​ കേസ്​ ഫയൽ ചെയ്തത്​. ഫോർഡ്​ ഫിഗോ കാർ 1,50,100 രൂപക്കും ബെലേറോ വാഹനം 2,50,250 രൂപക്കുമാണ്​ ലേലത്തിൽ വിറ്റത്​. ബാവ തന്നെയാണ്​ വാഹനം ലേലത്തിൽ പിടിച്ചത്​. കിൻഫ്ര നോളജ്​പാർക്ക്​ സ്ഥാപിക്കുന്നതിന്​ 2008ലാണ്​ രാമനാട്ടുകരയിൽ 76.66 ഏക്കർ ഭൂമി ഏറ്റെടുത്തത്​. ഭൂമിയുടെ ന്യായവിലയുടെ പത്തിലൊന്ന്​ മാത്രമാണ്​ നഷ്ടപരിഹാരമായി നൽകിയത്​. 125ഓളം കേസുകളിൽ 300ലേറെ സ്ഥലമുടമകൾക്ക്​ നഷ്ടപരിഹാര തുക പൂർണമായും നൽകിയിട്ടില്ല.