കൊളത്തറ മോഡല്‍ പുനരധിവാസ പാക്കേജ് എല്ലാവര്‍ക്കും ലഭ്യമാക്കണം -വ്യാപാരികള്‍

കോഴിക്കോട്: ചെറുവണ്ണൂര്‍-കൊളത്തറ റോഡ് നവീകരണവുമായി ബന്ധപ്പെട്ട് ഒഴിപ്പിക്കപ്പെടുന്ന വ്യാപാരികള്‍ക്കും തൊഴിലാളികള്‍ക്കും പുനരധിവാസ പാക്കേജ് പ്രഖ്യാപിച്ച സര്‍ക്കാറിന്റെ നിലപാട് സ്വാഗതാര്‍ഹമാണെന്ന് കേരള വ്യപാരി വ്യവസായി സമിതി ജില്ല ഭാരവാഹി യോഗം അഭിപ്രായപ്പെട്ടു. മാനാഞ്ചിറ-വെള്ളിമാടുകുന്ന്, കാരപ്പറമ്പ്, ബേപ്പൂര്‍-വട്ടക്കിണര്‍ റോഡുകളുടെ വികസനത്തിന്റെ ഭാഗമായും ധാരാളം കടകള്‍ ഒഴിപ്പിക്കപ്പെടുന്നുണ്ട്. ഇവിടങ്ങളിലെ വ്യാപാരികള്‍ക്കും തൊഴിലാളികള്‍ക്കും ചെറുവണ്ണൂര്‍-കൊളത്തറ റോഡ് വികസനത്തിന്റെ ഭാഗമായി പ്രഖ്യാപിച്ച അതേ പുനരധിവാസ പാക്കേജ് ലഭ്യമാക്കണമെന്ന് യോഗം ആവശ്യപ്പെട്ടു. പ്രസിഡന്റ് സൂര്യ അബ്ദുള്‍ ഗഫൂര്‍ അധ്യക്ഷത വഹിച്ചു. സി.കെ. വിജയന്‍, ടി. മരയ്ക്കാര്‍, കെ.എം. റഫീഖ്, സി.വി. ഇക്ബാല്‍, ഡി.എം. ശശീന്ദ്രന്‍ എന്നിവര്‍ സംസാരിച്ചു.