ആശുപത്രി ഉപകരണങ്ങളുടെ അറ്റകുറ്റപ്പണിക്കായി 'പുനർജനി'

കോഴിക്കോട്​: ആശുപത്രി ഉപകരണങ്ങളുടെ അറ്റകുറ്റപ്പണിക്കായി സർക്കാർ, സ്വകാര്യമേഖലകൾ കൈകോർക്കുന്നു. ആരോഗ്യവകുപ്പും ദേശീയ ആരോഗ്യദൗത്യവും പി.കെ സ്റ്റീൽസുമായി ചേർന്നാണ്​ പദ്ധതി തുടങ്ങിയത്​. മലാപ്പറമ്പ് വാക്സിന് സ്റ്റോറിലാണ്​ ഹോസ്പിറ്റൽ എക്യുപ്മെന്‍റ്​ റിപ്പയറിങ് യൂനിറ്റ് സജ്ജീകരിച്ചത്. 'പുനർജനി, ആശുപത്രി ഉപകരണങ്ങൾക്ക്​ പുതുജീവൻ' എന്ന പദ്ധതി പൊതുമരാമത്ത് ടൂറിസം മന്ത്രി പി.എ. മുഹമ്മദ് റിയാസ് ഉദ്​ഘാടനം ചെയ്തു. തിരുവനന്തപുരത്തും എറണാകുളത്തുമാണ്​ നിലവിൽ ഇത്തരം യൂനിറ്റുള്ളത്​. കോഴിക്കോട്, മലപ്പുറം, വയനാട്, കണ്ണൂർ, കാസർകോട് എന്നീ ജില്ലകളിലെ ആശുപത്രി ഉപകരണങ്ങൾ കോഴിക്കോട്ടാണ്​ അറ്റകുറ്റപ്പണി നടത്തുക. ഈ ജില്ലകളിലെ 438 സർക്കാർ ആശുപത്രികളുടെയും ആരോഗ്യവകുപ്പിന് കീഴിലുള്ള മറ്റു സ്ഥാപനങ്ങളുടെയും ഉപകരണങ്ങൾ, ശീതീകരണ ഉപകരണങ്ങൾ എന്നിവയുടെ അറ്റകുറ്റപ്പണികൾ ഇവിടെ നടത്തും. പി.കെ. സ്റ്റീലിന്‍റെ സഹായത്തോടെ അത്യാധുനിക രീതിയിലുള്ള ഉപകരണങ്ങൾ, മികച്ച കെട്ടിടം എന്നിവ സജ്ജീകരിച്ചിട്ടുണ്ട്​. പോളിടെക്നിക്, ഐ.ടി.ഐ വിദ്യാർഥികളുടെയും യൂനിറ്റിലെ സ്റ്റാഫിന്‍റെ സേവനവും വിനിയോഗിച്ചാണ് 'പുനർജനി' നടപ്പാക്കാൻ ഉദ്ദേശിക്കുന്നത്. രണ്ട്​ ലക്ഷം രൂപയാണ്​ പി.​കെ സ്റ്റീൽ നൽകിയത്​. ഉദ്​ഘാടനച്ചടങ്ങിൽ തോട്ടത്തിൽ രവീന്ദ്രൻ എം.എൽ.എ അധ്യക്ഷത വഹിച്ചു. സജാദ്, ഡോ. വി. ഉമ്മർ ഫാറൂഖ്, കെ.സി. ശോഭിത, ഡോ. എ. നവീൻ, പി.കെ സ്റ്റീൽ കോർപറേറ്റ് റിലേഷൻസ് ജനറൽ മാനേജർ പ്രശാന്ത് കുമാർ എന്നിവർ സംബന്ധിച്ചു.