ഗൂഡല്ലൂരിൽ ഡി.എം.കെ പ്രവർത്തകനെ കുത്തിക്കൊന്നു

ഗൂഡല്ലൂർ: ഡി.എം.കെ പ്രവർത്തകനെ എ.ഡി.എം.കെ പ്രവർത്തകൻ കുത്തിക്കൊന്നു. മറ്റൊരാളെ ഗുരുതര നിലയിൽ ആശുപത്രിയിൽ പ്രവേശിപ്പിച്ചു. ദേവർഷോല പഞ്ചായത്തിലെ പാടന്തറ കെണിയംവയലിലാണ് ഡി.എം.കെ പ്രവർത്തകനായ ശബീർ(38) ചൊവ്വാഴ്ച രാത്രി ഏഴരയോടെ കുത്തേറ്റ് മരിച്ചത്. സംഭവവുമായി ബന്ധപ്പെട്ട് എ.ഐ.എ.ഡി.എം.കെ സ്ഥാനാർഥി സംജിത്തിന്റെ ഭർത്താവ് നൗഷാദിനെ​ പൊലീസ് തിരയുന്നു. ഇയാൾ ഒളിവിലാണ്. കുത്തേറ്റ അക്ബറലി എന്ന യുവാവിനെ പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ചു. പഞ്ചായത്ത് തെരഞ്ഞെടുപ്പിൽ എ.ഡി.എം.കെ സ്ഥാനാർഥിയായി മത്സരിച്ച നൗഷാദിന്റെ ഭാര്യ പൂവിയെന്ന സംജിത്ത് പരാജയപ്പെട്ടിരുന്നു. ഇതിനെ ചൊല്ലിയുണ്ടായ കളിയാക്കലും മറ്റുമാണ് കത്തിക്കുത്തിൽ കലാശിച്ചത്.