ഐ.ഐ.എം.കെയിൽ പഠിച്ചിറങ്ങിയവർക്കെല്ലാം ഉയർന്ന ശമ്പളത്തോടെ ജോലി

കോഴിക്കോട്​: ഇന്ത്യൻ ഇൻസ്​റ്റിറ്റ്യുട്ട്​ മാനേജ്​മെന്‍റ്​ ​കോഴി​ക്കോടിൽ (ഐ.ഐ.എം.കെ) കഴിഞ്ഞ ബാച്ചിൽ​ പഠിച്ചിറങ്ങിയ എല്ലാവർക്കും കനത്ത ശമ്പളത്തോടെ മികച്ച കമ്പനികളിൽ ജോലി. മൂന്നു ദിവസമായി നടന്ന പ്ലേസ്​മെന്‍റ്​ വീക്കിന്​ ശേഷമാണ്​ 546 പേരെ 161 കമ്പനികൾ ജോലിക്കാരായി സ്വീകരിച്ചത്​. 24ം പി.ജി.പി എം.ബി.എ പ്രോഗ്രാമിലെ 466ഉം പ്രഥമ പി.ജി.പി ഫിനാൻസ്​, ലിബറൽ സ്റ്റഡീസ്​ ആൻഡ്​ മാനേജ്​മെന്‍റ്​ കോഴ്​സിലെ 40 വീതവും വിദ്യാർഥികൾക്കാണ്​​ ജോലി ലഭിച്ചത്​. 41 ശതമാനം പേർക്ക്​ കൺസൾട്ടിങ്​ മേഖലയിലാണ്​ ജോലി ഉറപ്പായത്​. ബാങ്കുകളടക്കമുള്ള ധനകാര്യ സ്ഥാപനങ്ങൾ 15 ശതമാനം പേർക്ക്​ ജോലി നൽകി​. സെയിൽസ്​, മാർക്കറ്റി​ങ്​ കമ്പനികളിലേക്ക്​ 13ഉം ഐ.ടിയിലേക്ക്​ 15ഉം മറ്റ്​ മാനേജ്​മൻെറ്​ വിഭാഗങ്ങളിലേക്ക്​ 16ഉം ശതമാനം പേർക്ക്​ നിയമനം കിട്ടി. 31.3 ശതമാനമാണ്​ കഴിഞ്ഞ വർഷത്തേക്കാൾ ശരാശരി ശമ്പള വർധനവ്​. 29.5 ലക്ഷമാണ്​ ശരാശരി വാർഷിക ശമ്പളം. ആക്സഞ്ചർ, ആമസോൺ, അ​മേരിക്കൻ എക്സ്​പ്രസ്​, ഏഷ്യൻ പെയിന്‍റ്​സ്​, അവൻഡസ്​ ക്യാപിറ്റൽ, ബോസ്റ്റൺ കൺസൾട്ടിങ്​, സിറ്റി ബാങ്ക്​, ഡ്യൂഷെ ബാങ്ക്​, എവറസ്റ്റ്​ ​ഗ്രൂപ്​, മൈക്രോസോഫ്​റ്റ്​, നെസ്​ലെ, ഫ്ലിപ്​കാർട്ട്​ തുടങ്ങിയ നിരവധി ​പ്രമുഖ കമ്പനികളാണ്​ റിക്രൂട്ട്​മെന്‍റിൽ പ​ങ്കെടുത്തത്​. അദാനി ഗ്രൂപ്​, മീഷോ, സ്വിഗി തുടങ്ങി 39 കമ്പനികൾ ഇതാദ്യമായി പ്ലേസ്​മെന്‍റ്​ വീക്കിൽ പ​ങ്കെടുത്തു. സിറ്റി മാൾ, പോർട്ടർ തുടങ്ങിയ സ്റ്റാർട്ടപ്പുകളും ജോലിക്കെടുത്തു. ഐ.ഐ.എം.കെയോടുള്ള വിവിധ കമ്പനികളുടെ വിശ്വാസമാണ്​ ഇത്തവണത്തെ റിക്രൂട്ട്​മെന്‍റിലും വ്യക്​തമാകുന്നതെന്ന്​ ഡയറക്ടർ പ്രഫ. ദേബാഷിശ്​ ചാറ്റർജി പറഞ്ഞു. പൂർവ വിദ്യാർഥികളുടെ പിന്തുണയും സഹകരണവും തുണയായെന്നും അദ്ദേഹം കൂട്ടിച്ചേർത്തു. സ്വന്തം ലേഖകൻ