ഈസ്റ്റ്​ഹിൽ കേന്ദ്രീയ വിദ്യാലയത്തിൽ അതിരാവിലെ ഷിഫ്​റ്റിന്​ മാറ്റമില്ല

കോഴിക്കോട്​: മറ്റു​ സ്​കൂളുകളെല്ലാം ഷിഫ്​റ്റ്​ സമ്പ്രദായം ഒഴിവാക്കിയിട്ടും ഈസ്റ്റ്​ഹിൽ കേന്ദ്രീയ വിദ്യാലയത്തിലെ വിദ്യാർഥികൾക്ക്​ ദുരിതം തുടരുകയാണ്​. ആവശ്യത്തിന്​ കെട്ടിടമില്ലാത്തതിനാൽ നാലു​ വർഷം മുമ്പുള്ള അതേ ഷിഫ്​റ്റ്​ സമ്പ്രദായമാണ്​ കോവിഡ്​ ഭീഷണി ഒഴിഞ്ഞിട്ടും ഈ വിദ്യാലയത്തിൽ. രാവിലെ ഏഴിനാണ് ആദ്യ ഷിഫ്​റ്റ്​ തുടങ്ങുന്നത്​. 45 കിലോമീറ്റർ ദൂരെനിന്നുവരെ കുട്ടികൾ പുലർച്ചെ എഴുന്നേറ്റ്​ വരേണ്ട അവസ്​ഥയാണ്. നടുവണ്ണൂർ, ബാലുശ്ശേരി തുടങ്ങിയ സ്ഥലങ്ങളിൽനിന്ന്​ സൂര്യനുദിക്കുന്നതിനുമുമ്പ്​ പുറപ്പെട്ടാൽ മാത്രമേ ഈസ്റ്റ്​ഹില്ലിലുള്ള വിദ്യാലയത്തിൽ എത്താനാകൂ. ഭക്ഷണംപോലും കാര്യമായി കഴിക്കാതെയാണ്​ രാവിലെയുള്ള ഷിഫ്​റ്റിനായി മിക്ക വിദ്യാർഥികളുമെത്തുന്നത്​. പരീക്ഷക്കാലത്ത്​ മാത്രമാണ്​ ഷിഫ്​റ്റിൽ ചെറിയ ആശ്വാസം. ഉച്ചക്കുശേഷമുള്ള ഷിഫ്​റ്റിലെ വിദ്യാർഥികൾ രാത്രി വൈകിയാണ്​ വീടുകളിലെത്തുന്നത്​. കുട്ടികളുടെ പഠനത്തിനായി രക്ഷിതാക്കളും ഏറെ ബുദ്ധിമുട്ട്​ സഹിക്കുകയാണ്​. പത്താം ക്ലാസുകാർക്ക്​ ബാച്ചുകളായി തിരിച്ച്​ രണ്ടര മണിക്കൂർ മാത്രമാണ്​ ക്ലാസെടുക്കുന്നത്. വർഷങ്ങൾ പഴക്കമുള്ള പഴയ ബ്ലോക്കിലെ കെട്ടിടത്തി​ന്റെ സൺഷെയ്​ഡ്​ അടർന്നുവീണ്​ 2018 സെപ്​റ്റംബറിൽ വിദ്യാർഥിക്ക്​ പരിക്കേറ്റിരുന്നു. തുടർന്നാണ്​ സുരക്ഷ പരിഗണിച്ച്​ ക്ലാസുകൾ ഷിഫ്​റ്റ്​ സ​മ്പ്രദായത്തിലേക്കു​ മാറ്റിയത്. 20 മുറികളുള്ള താൽക്കാലിക ​കെട്ടിടം ഒന്നര മാസത്തിനുള്ളിൽ സജ്ജമാക്കാൻ രക്ഷിതാക്കളുടെ സംഘടനയായ 'വേക്​' തീരുമാനിച്ചിരുന്നു. എന്നാൽ, കേന്ദ്രീയ വിദ്യാലയ സംഘാതൻ അധികൃതർ കടുത്ത എതിർപ്പുയർത്തുകയായിരുന്നു​. വിദ്യാലയത്തിൽ കെട്ടിടം നിർമിക്കാനോ ഇതുസംബന്ധിച്ച സാമ്പത്തിക ഇടപാടുകൾ നടത്താനോ പി.ടി.എക്ക്​ അനുവാദം നൽകാനാവില്ല എന്നായിരുന്നു നിലപാട്​. താൽക്കാലിക കെട്ടിടം നിർമിക്കാൻ രക്ഷിതാക്കളിൽനിന്ന്​ പിരിച്ചെടു​ത്ത 45,24,000 രൂപ പി.ടി.എ തിരിച്ചുകൊടുക്കുകയായിരുന്നു. നിലവിൽ കെട്ടിടത്തിന്റെ നിർമാണം പുരോഗമിക്കുന്നുണ്ട്​. ഈ വർഷം ഡിസംബറോടെ പൂർത്തിയാക്കു​മെന്നാണ്​ നിർമാണം നടത്തുന്ന കേന്ദ്ര പൊതുമരാമത്ത്​ വകുപ്പ്​ അറിയിച്ചിരിക്കുന്നത്​. എന്നാൽ, ഈ ഉറപ്പ്​ പാലിക്കാനാകുമോയെന്ന സംശയമാണ്​ ചില രക്ഷിതാക്കളുയർത്തുന്നത്​. കോവിഡ്​ കാലത്ത്​ നിർമാണം ഉഴപ്പിയതായും ഇവർ ആരോപിക്കുന്നു. ഓൺലൈൻ ക്ലാസുകൾ നടന്ന കോവിഡ്​ സമയത്ത്​ നിർമാണം കൃത്യമായി നടന്നിരുന്നെങ്കിൽ വിദ്യാർഥികളുടെ ദുരിതത്തിന്​ പരിഹാരമാകുമായിരുന്നു. നടപടികൾ വേഗത്തിലാക്കുമെന്ന്​ അന്നത്തെ കേന്ദ്ര മാനവ വിഭവശേഷി വകുപ്പ് സഹമന്ത്രി സഞ്ജയ് ധോത്രെ നൽകിയ ഉറപ്പും പാഴായി. 3000ത്തിലേറെ കുട്ടികൾ പഠിക്കുന്ന സ്കൂളിന്റെ വികസനത്തിൽ ജന​പ്രതിനിധികളും ഇടപെടുന്നില്ലെന്നും രക്ഷിതാക്കൾ പറയുന്നു. ജില്ലയി​ൽ നിലവിലുള്ള രണ്ടു കേന്ദ്രീയ വിദ്യാലയങ്ങളും നഗരത്തിൽതന്നെയായതിനാൽ ഗ്രാമപ്രദേശങ്ങളിലുള്ള വിദ്യാർഥികളു​ടെ സൗകര്യാർഥം ഉള്ള്യേരി ആഞ്ജനോറമലയിൽ കേന്ദ്രീയ വിദ്യാലയം നിർമിക്കാനുള്ള നടപടികൾ സജീവമായിട്ടുണ്ട്​. സ്വന്തം ലേഖകൻ