കുതിരവട്ടം കൊല: പ്രതിയുടെ മാനസികാരോഗ്യ പരിശോധന ഉടൻ; അന്വേഷണ റിപ്പോർട്ട്​ ഇന്ന്​ കൈമാറും

കോഴിക്കോട്​: കുതിരവട്ടം മാനസികാരോഗ്യകേന്ദ്രത്തിൽ അന്തേവാസിയായ യുവതി കൊല്ലപ്പെട്ട സംഭവത്തിൽ പ്രതിയുടെ മാനസികാരോഗ്യ പരിശോധന തിങ്കളാഴ്ച നടത്തിയേക്കും. കൊല്ലപ്പെട്ട മഹാരാഷ്ട്ര സ്വദേശിനി ജിയറാം ജിലോട്ടിന്‍റെ സെല്ലിലുണ്ടായിരുന്ന ബംഗാൾ സ്വദേശിനി തസ്‌മി ബീവിയുടെ ആരോഗ്യപരിശോധനയാണ്​ നടത്തുന്നത്​. കേസന്വേഷിക്കുന്ന മെഡിക്കൽ കോളജ്​ പൊലീസ്​ അപേക്ഷ നൽകിയിട്ടുണ്ടെന്നും ഡോക്ടർമാരുടെ നേതൃത്വത്തിൽ തിങ്കളാഴ്ച ആരോഗ്യപരിശോധന നടത്തി റിപ്പോർട്ട്​ നൽകാനാണ്​ ശ്രമമെന്നും ആരോഗ്യകേന്ദ്രം സൂപ്രണ്ട്​ ഡോ. കെ.സി. രമേശൻ പറഞ്ഞു. അതിനിടെ, അന്തേവാസിയുടെ ​കൊലപാതകവുമായി ബന്ധപ്പെട്ട്​ ആഭ്യന്തര അന്വേഷണം നടത്തിയ ഡെപ്യൂട്ടി സൂപ്രണ്ട്​ ഡോ. വി.വി. ആശയു​ടെ റിപ്പോർട്ട്​ തിങ്കളാഴ്ച സൂപ്രണ്ട്​ ജില്ല മെഡിക്കൽ ഓഫിസർ ഡോ. വി. ഉമർ ഫാറൂഖിന്​ കൈമാറും. ജീവനക്കാർ ​സെല്ലിൽ നിരീക്ഷണം നടത്തുന്നതിലടക്കം വീഴ്ചയുണ്ടായതായി അന്വേഷണത്തിൽ കണ്ടെത്തിയെന്നാണ്​ വിവരം. ഒരു നഴ്​സും രണ്ടു​ നഴ്​സിങ്​ അസിസ്റ്റന്‍റുമാരുമാണ്​ സംഭവസമയത്ത് ഡ്യൂട്ടിയിലുണ്ടായിരുന്നത്​. അടിപിടിയുണ്ടായതോ​ടെ ബീവിയെ മറ്റൊരു സെല്ലിലേക്കു മാറ്റി​യെന്നതല്ലാതെ തറയിൽ വീണുകിടന്ന ജിയറാം ജിലോട്ടിന്​ ജീവനക്കാരിൽനിന്ന്​ വേണ്ട പരിചരണം ലഭിച്ചില്ലെന്നും പരാതിയുണ്ട്​. റിപ്പോർട്ട്​ ലഭിച്ചശേഷം ഡി.എം.ഒ ആണ്​ ഉദ്യോഗസ്ഥർക്കെതി​രെ നടപടി സ്വീകരിക്കുക. സംഭവത്തിൽ സ്വമേധയാ കേസ്​ രജിസ്റ്റർ ചെയ്ത മനുഷ്യാവകാശ കമീഷൻ ആരോഗ്യകേന്ദ്രം അധികൃതരിൽനിന്നും സിറ്റി പൊലീസ്​ മേധാവിയിൽനിന്നും റിപ്പോർട്ട്​ തേടിയിട്ടുമുണ്ട്​.