അധ്യാപകന്​​ കാരണം കാണിക്കൽ നോട്ടീസ്​ ഫാഷിസ്റ്റ് രീതി -കെ.പി.എസ്.ടി.എ

കണ്ണൂർ: ഫോക്കസ് ഏരിയ വിഷയത്തിൽ സർക്കാറി​ന്‍റെ ഭാഗത്തു വന്ന വീഴ്ചകൾ ചൂണ്ടിക്കാണിച്ച അധ്യാപകനെതിരെ അച്ചടക്ക നടപടി സ്വീകരിക്കുന്നത് ജനാധിപത്യവിരുദ്ധവും ഫാഷിസ്റ്റ് സമീപനവുമാണെന്ന് കെ.പി.എസ്.ടി.എ ജില്ല കമ്മിറ്റി അഭിപ്രായപ്പെട്ടു. എസ്.എസ്.എൽ.സി, പ്ലസ് ടു പരീക്ഷകളുമായി ബന്ധപ്പെട്ട് സർക്കാർ വരുത്തിയ മാറ്റങ്ങൾക്കെതിരെ ഫേസ്​ബുക്കിൽ ലേഖനമെഴുതിയ സംഭവത്തിൽ പയ്യന്നൂർ ഗവ. ഗേൾസ് ഹയർ സെക്കൻഡറി സ്കൂൾ മലയാളം അധ്യാപകനും എഴുത്തുകാരനുമായ പി. പ്രേമചന്ദ്രനാണ്​ സർക്കാർ​ കാരണം കാണിക്കൽ നോട്ടീസ് നൽകിയത്​​. ​ ജില്ല പ്രസിഡന്‍റ്​ യു.കെ. ബാലചന്ദ്രൻ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ്​ കെ. രമേശൻ, ജില്ല സെക്രട്ടറി വി. മണികണ്ഠൻ, ജില്ല ട്രഷറർ സി.വി.എ. ജലീൽ, ആർ.കെ. സദാനന്ദൻ, പി.എം. ദിനേശൻ, രാധാകൃഷ്ണൻ മാണിക്കോത്ത്​, എം.കെ. അരുണ, സി.എം. പ്രസീത, എൻ.കെ.എ. ലത്തീഫ് എന്നിവർ സംസാരിച്ചു.