യോഗി തുറന്നു കാണിച്ചത് ഭരണപരാജയം -കെ. സുരേന്ദ്രൻ

കോഴിക്കോട്: യു.പി മുഖ്യമന്ത്രി യോഗി ആദിത്യനാഥ് തുറന്നു കാണിച്ചത് കേരളത്തിലെ ഭരണപരാജയത്തെയാണെന്ന് ബി.ജെ.പി സംസ്ഥാന പ്രസിഡന്റ്​ കെ. സുരേന്ദ്രൻ. എന്നാൽ, യോഗിയുടെ വിമർശനം കേരളത്തിനെതിരാണെന്ന് വരുത്തിത്തീർക്കാനാണ് മുഖ്യമന്ത്രി പിണറായി വിജയൻ ശ്രമിക്കുന്നത്. കേരളം എല്ലാത്തിലും നമ്പർ വണ്ണാണെന്ന് പറയുന്ന പിണറായി വിജയൻ എന്തിനാണ് ചികിത്സക്ക് അമേരിക്കയിൽ പോയതെന്ന് പറയണം. വാർത്തസമ്മേളനങ്ങളിൽ മറ്റു സംസ്ഥാനങ്ങളെ വിമർശിക്കാറുള്ള പിണറായി വിജയൻ തിരിച്ച് വിമർശനം ഏറ്റുവാങ്ങുമ്പോൾ പ്രാദേശിക വികാരം കത്തിക്കുന്നത് ലജ്ജാകരമാണ്. സർക്കാർ പദ്ധതികളെല്ലാം അഴിമതി നടത്താനുള്ള ഉപാധിയാക്കി മാറ്റിയ സർക്കാറാണ് കേരളം ഭരിക്കുന്നതെന്നും സുരേന്ദ്രൻ പറഞ്ഞു.