ബാലുശ്ശേരി - കോഴിക്കോട് റോഡ് വികസനം; വിട്ടുപോയ സർവേ നമ്പറുകൾ ഉൾപ്പെടുത്തി പുനർവിജ്ഞാപനം

കക്കോടി: ബാലുശ്ശേരി - കോഴിക്കോട് റോഡ്​ വീതി കൂട്ടുന്നതിന്​ ഏറ്റെടുക്കുന്ന ഭൂമിയുടെ സർവേ വിജ്ഞാപനം ഇറങ്ങി. മുമ്പ്​ ഇറങ്ങിയ 11 - 1 വിജ്ഞാപനത്തിൽ വിട്ടുപോയിട്ടുള്ള വില്ലേജുകളിലെ സർവേ നമ്പറുകൾ ഉൾപ്പെടുത്തിയാണ്​ പുനർവിജ്ഞാപനം​ ഇറങ്ങിയത്​. നന്മണ്ട, കാക്കൂർ, ചേളന്നൂർ, കക്കോടി, വേങ്ങേരി, ശിവപുരം വില്ലേജുകളിലായി വിട്ടുപോയ സർവേ നമ്പറുകളാണ് പുതിയ വിജ്ഞാപനത്തിലുള്ളത്. ഈ വിജ്ഞാപനത്തി​ന്‍റെ നടപടികൾ പൂർത്തിയായ ശേഷമേ ഭൂമി ഏറ്റെടുക്കൽ വിജ്ഞാപനം ഇറങ്ങുകയുള്ളൂ. അടിസ്ഥാന മൂല്യനിർണയ റിപ്പോർട്ട് സമർപ്പിച്ചു. വിശദമായ മൂല്യനിർണയം​, കൃഷിവകുപ്പിൽ നിന്നുള്ള തണ്ണീർതടങ്ങളും അല്ലാത്തതുമായ ഭൂമി വേർതിരിച്ചുള്ള വിജ്ഞാപനം എന്നിവ കൂടി തയാറാക്കേണ്ടതുണ്ട്​. ഇതിനു ശേഷമെ ഭൂമി ഏറ്റെടുക്കാനുള്ള വിജ്ഞാപനം ഉണ്ടാവുകയുള്ളൂ. കോഴിക്കോട് - ബാലുശ്ശേരി റോഡ് വികസനത്തി​ന്‍റെ ഭാഗമായി 0.6042 ഹെക്ടർ ഭൂമിയാണ് ജില്ലയിലെ വില്ലേജുകളിൽ നിന്നും ഏറ്റെടുക്കുന്നത്​. കിഫ്​ബിയിൽ നിന്നാണ്​ റോഡിനുള്ള തുക വകയിരുത്തുന്നത്​.