വേങ്ങാട്ട് ഇസ്മയിൽ ഹാജി; ഫറോക്കിന് നഷ്ടപ്പെട്ടത് മികച്ച സംഘാടകനെ

ഫറോക്ക്: പണക്കാരനാണോ പാവപ്പെട്ടവനാണോ എന്ന്​ നോക്കാതെ, പ്രായഭേദമന്യേ വലിയ സൗഹൃദത്തിന് ഉടമയും മികച്ച സംഘാടകനുമായിരുന്നു വേങ്ങാട്ട് ഇസ്മയിൽ ഹാജി. എല്ലാവിഭാഗത്തിൽപെട്ടവരോടും എളിമയോടുകൂടി പ്രവർത്തിക്കുകയും ഫറോക്കിലെ സാമൂഹിക, സാംസ്കാരിക, വിദ്യാഭ്യാസ, വ്യവസായ, മതരംഗത്തെ നിറസാന്നിധ്യവുമായിരുന്നു ഇദ്ദേഹം. മരണവിവരമറിഞ്ഞ് നൂറുകണക്കിനാളുകളാണ് മൃതദേഹം കാണാനെത്തിയത്. ഫാറൂഖ് കേളജ് റൗദത്തുൽ ഉലൂം അസോസിയേഷൻ അനുബന്ധ സ്ഥാപനങ്ങളുടെ ഭാരവാഹിത്വം വഹിച്ചിരുന്ന ഇസ്മയിൽ ഹാജി ഒട്ടേറെ സംഭാവനകൾ അർപ്പിച്ചിട്ടുണ്ട്. എം.എസ്.എസ് സ്ഥാപക നേതാക്കളിൽ ഒരാളാണ്. പിന്നാക്കം നിൽക്കുന്ന വിഭാഗത്തിന് എല്ലാവിധ സഹായ സഹകരണങ്ങളുമായി എന്നും മുന്നിൽ നിന്നിരുന്നു. കേരള ബസ് ഓപറേറ്റിവ് ഫെഡറേഷ​ൻ സ്ഥാപക നേതാവും കോഴിക്കോട് ജില്ല പ്രഥമ പ്രസിഡൻറുമായിരുന്നു. പേട്ട മഹല്ല് ദുരിതാശ്വാസ കമ്മിറ്റിയുടെ പ്രസിഡൻറായിരുന്ന ഇദ്ദേഹത്തിന്റെ ശ്രമഫലമായി നിരവധി ജീവകാരുണ്യ പ്രവർത്തനങ്ങൾ നടത്തിയിരുന്നു. എം.എസ്.എസ് യൂത്ത് വിങ്ങിന്റെ പ്രഥമ സംസ്ഥാന നേതാവെന്ന നിലയിൽ ഒട്ടേറെ ക്ഷേമപദ്ധതികൾ ആവിഷ്കരിച്ച് നടപ്പാക്കിയിരുന്നു. ഫറോക്ക് മേഖലക്ക് കനത്ത നഷ്ടമാണ് അദ്ദേഹത്തി‍ന്റെ വിയോഗം. പൊതുമരാമത്ത് മന്ത്രി പി.എ. മുഹമ്മദ് റിയാസ്, പാണക്കാട് സാദിഖലി ശിഹാബ് തങ്ങൾ, പി.കെ. കുഞ്ഞാലിക്കുട്ടി എം.എൽ.എ, മുസ്​ലിം ലിഗ് സംസ്ഥാന വൈസ് പ്രസിഡന്‍റ്​ എം.സി. മായിൻഹാജി, മുൻ ഡി.സി.സി പ്രസിഡന്‍റ്​ കെ.സി. അബു, ടി.പി. അബ്ദുല്ലക്കോയ മദനി, ഫറോക്ക് നഗരസഭ ചെയർമാൻ എൻ.സി. അബ്ദുറസാഖ്, സി.എം.പി നേതാവ് സി.എൻ. വിജയകൃഷ്ണൻ, എം.ഇ.എസ്. ജില്ല പ്രസിഡൻറ് പി.കെ. അബ്ദുൽ ലത്തീഫ് തുടങ്ങി സമൂഹത്തിലെ നാനാതുറകളിൽനിന്നുള്ളവർ അന്ത്യോപചാരം അർപ്പിക്കാൻ എത്തി.