പരപ്പൻപൊയിൽ-പുന്നശ്ശേരി-കാരക്കുന്നത്ത് റോഡ് പ്രവൃത്തി ഉടൻ ആരംഭിക്കും

കൊടുവള്ളി: മണ്ഡലത്തിലെ താമരശ്ശേരി, കിഴക്കോത്ത്, നരിക്കുനി പഞ്ചായത്തുകളിലൂടെയും കൊടുവള്ളി നഗരസഭയിലൂടെയും കടന്നുപോകുന്ന പ്രധാന റോഡുകളിലൊന്നായ പരപ്പൻപൊയിൽ-എളേറ്റിൽ പുന്നശ്ശേരി-കാരകുന്നത്ത് റോഡ് വികസനത്തിന് സ്ഥലം ഏറ്റെടുക്കൽ അന്തിമഘട്ടത്തിലാണെന്നും റോഡ് പ്രവൃത്തി ഉടൻ ആരംഭിക്കുമെന്നും ഡോ.എം.കെ. മുനീർ എം.എൽ.എ പറഞ്ഞു. കിഫ്ബി പദ്ധതിയിലുൾപ്പെടുത്തി 45.27 കോടി രൂപയാണ് വകയിരുത്തിയത്. ദേശീയപാത 766ലെ പരപ്പൻപൊയിൽ മുതൽ കാപ്പാട് തുഷാരഗിരി സംസ്ഥാന പാതയിലെ കാരക്കുന്നുവരെ പത്ത് മീറ്റർ വീതിയിൽ 10 കിലോമീറ്ററാണ് റോഡ് വികസിപ്പിക്കുന്നത്. മണ്ഡലത്തിലെ വിവിധ നിർമാണ പദ്ധതികൾ സംബന്ധിച്ച് കഴിഞ്ഞ ദിവസം പി.ഡബ്ല്യു.ഡി, കെ.ആർ.എഫ്.ബി, വാട്ടർ അതോറിറ്റി ഉദ്യോഗസ്ഥരുമായി നടത്തിയ അവലോകന യോഗത്തിൽ സംസാരിക്കുകയായിരുന്നു എം.എൽ.എ. ആർ.ഇ.സി-കൂടത്തായി റോഡ്, നരിക്കുനി റിങ് റോഡ്, തലയാട്-മലപുറം-കോടഞ്ചേരി റോഡ് എന്നീ പ്രവൃത്തികളുടെ അവലോകനവും നടന്നു. നരിക്കുനി പഞ്ചായത്ത് പ്രസിഡൻറ് സലീം, ഓമശ്ശേരി പഞ്ചായത്ത് പ്രസിഡന്റ് അബ്ദുൽ നാസർ, കിഴക്കോത്ത് പഞ്ചായത്ത് പ്രസിഡന്റ് നസ്റി, നഗരസഭ കൗൺസിലർ എ.പി. മജീദ്, കെ.കെ. ജബ്ബാർ, യൂനുസ് അമ്പലക്കണ്ടി എന്നിവരും സംബന്ധിച്ചു.