വാർത്ത സംപ്രേഷണത്തിന് മണാശ്ശേരി സ്കൂളിൽ തുടക്കം

മുക്കം: മണാശ്ശേരി ഗവ. യു.പി സ്കൂളിൽ ലിറ്റിൽ ജേണലിസ്റ്റ് പദ്ധതിയുടെ ഭാഗമായി 'പൂവത്തിചോട്ടീന്ന്' വാർത്ത ചാനൽ മുക്കം സി.ടി.വി സ്റ്റുഡിയോയിൽ സി.ടി.വി സി.ഇ.ഒ എ.സി. നിസാർ ബാബു ഉദ്ഘാടനം ചെയ്തു. കുട്ടികൾക്ക് മാധ്യമരംഗത്തെ കുറിച്ച് അഭിരുചി വളർത്തുന്നതിനും ചുറ്റുമുള്ള കാഴ്ചകളെ നിരീക്ഷിക്കുന്നതിനും ലക്ഷ്യംവെച്ചുള്ള പദ്ധതിയാണ് ലിറ്റിൽ ജേണലിസ്റ്റ്. വിദ്യാർഥികളായ എം.ബി. ആര്യ , ആകാശ്, അർച്ചന, ശ്രീനന്ദ, ദേവിക, റിഫ എന്നീ കുട്ടികളാണ് വാർത്തചാനലിന്റെ മുന്നിൽ പ്രവർത്തിച്ചത്. ലിറ്റിൽ ജേണലിസ്റ്റ് ഉദ്ഘാടനവുമായി ബന്ധപ്പെട്ട് കുട്ടികൾക്ക് മാധ്യമരംഗത്തെ പ്രവർത്തനങ്ങളെക്കുറിച്ച് ക്ലാസുകൾ നൽകിയിരുന്നു. അധ്യാപകരായ അനിൽ, ഷണ്മുഖൻ, അനഘ, മിഥുൻ, നിഷി, ആരതി എന്നിവരാണ് ചാനലിന്റെ പ്രവർത്തനങ്ങൾക്ക് കുട്ടികൾക്ക് നേതൃത്വം നൽകുന്നത്.