പച്ചക്കറി കൃഷിയുമായി കുട്ടി കർഷകർ

നന്മണ്ട: കുട്ടമ്പൂർ കുറ്റിവയലിൽ പച്ചക്കറി കൃഷിയുമായി കുട്ടി കർഷകരുടെ രംഗപ്രവേശം. ബാലസംഘം വെള്ളച്ചാൽ ഈസ്റ്റ് വെസ്റ്റ് യൂനിറ്റുകളുടെ സംയുക്താഭിമുഖ്യത്തിലാണ് കുട്ടികൾ പാടത്തിറങ്ങിയത്. കർഷക അവാർഡ് ജേതാവ് കെ.വി. അബ്ദുള്ള മാസ്റ്റർ കൃഷിയുടെ ബാലപാഠങ്ങൾ കുട്ടികൾക്ക് വിശദീകരിച്ചു. നാടൻപാട്ട് കലാകാരൻ കോട്ടക്കൽ ഭാസ്കരൻ പഴയകാല കാർഷികപ്പാട്ടുകൾ പാടി കുട്ടികളെ ആവേശത്തിലാക്കി. വേനൽക്കാല പച്ചക്കറി കൃഷിക്കായി പച്ചക്കറി തൈകൾ നട്ടുപിടിപ്പിച്ചുകൊണ്ട് കാക്കൂർ ഗ്രാമപഞ്ചായത്ത് പ്രസിഡൻറ് സി.എം. ഷാജി ഉദ്ഘാടനംചെയ്തു. കെ. വൈശാഖ് അധ്യക്ഷത വഹിച്ചു. ബി.എസ്. ആദിത്യൻ, ബൈജു സുജന, ശ്രീനി രാമല്ലൂർ, കെ. പ്രജിഷ, ബി.എസ്. വൈഗ പാർവതി, എ.പി. സിദ്ധുപ്രിയ എന്നിവർ സംബന്ധിച്ചു. കെ.വി. അബ്ദുള്ള, റിട്ട. പ്രിൻസിപ്പൽ സത്യൻ, പ്രഭാകരൻ നായർ, ബൈജൂ സുജന എന്നിവരുടെ നേതൃത്വത്തിലാണ് പദ്ധതി. പടം: കുട്ടമ്പൂർ പാടത്ത് കുട്ടി കർഷകരുടെ കൃഷി കാക്കൂർ ഗ്രാമപഞ്ചായത്ത് പ്രസിഡന്റ് സി.എം. ഷാജി ഉദ്ഘാടനംചെയ്യുന്നു