കോവിഡ് ബാധിതർക്കുള്ള സഹായധനം വിതരണം ചെയ്യണം -ആർ.എം.പി.ഐ

വടകര: കോവിഡ് ബാധിച്ച് മരിച്ചവരുടെ ആശ്രിതർക്കും കോവിഡ് മൂലമുള്ള നിയന്ത്രണങ്ങളാൽ തൊഴിൽ നഷ്​ടപ്പെട്ടവർക്കും നൽകേണ്ട സഹായധനം വിതരണം ചെയ്യാൻ കേന്ദ്ര-സംസ്ഥാന സർക്കാറുകൾ തയാറാകണമെന്ന് ആർ.എം.പി.ഐ സംസ്ഥാന കമ്മിറ്റി ആവശ്യപ്പെട്ടു. ദുരന്തനിവാരണ നിയമം അനുസരിച്ച് കോവിഡ് ബാധിച്ചു മരിച്ചവരുടെ ആശ്രിതർക്ക് നഷ്​ടപരിഹാരം നൽകണമെന്ന സുപ്രീംകോടതി നിർദേശം കേരളത്തിലും നടപ്പാക്കണം. കോവിഡ് ബാധിച്ചു മരിച്ചവരുടെ യഥാർഥ കണക്ക് രേഖപ്പെടുത്താൻ ആരോഗ്യ വകുപ്പ് തയാറാകണം. കോവിഡ് ബാധിച്ചു മരിച്ചവരുടെ കണക്കുകൾ ശരിയാംവിധം രേഖപ്പെടുത്താത്തതിനാൽ നിരവധി പേർക്ക് നഷ്​ടപരിഹാരം നിഷേധിക്കപ്പെടുന്ന സ്ഥിതിയാണുള്ളത്. ഇക്കാര്യത്തിൽ മരണകാരണം തിരുത്തി രേഖകൾ നൽകാൻ ലളിതമായ നടപടിക്രമങ്ങൾ സ്വീകരിക്കണം. ഇതിനകംതന്നെ ബിഹാർ സർക്കാർ മൃതിയടഞ്ഞവരുടെ ബന്ധുക്കൾക്ക് നാലു ലക്ഷം രൂപ നഷ്​ടപരിഹാരം നൽകിത്തുടങ്ങി. കർണാടകയിലും തമിഴ്​നാട്ടിലും സർക്കാർ ധനസഹായം നൽകുന്നുണ്ട്. കേരള സർക്കാർ ഇക്കാര്യത്തിൽ ഒളിച്ചുകളി നടത്തുകയാണ്. മുഖ്യമന്ത്രിയുടെ അവകാശവാദങ്ങൾ വസ്തുതകളുമായി ബന്ധപ്പെട്ടതല്ല. കോവിഡ് ബാധിതരെ കണ്ടെത്താനുള്ള പരിശോധന പോലും ആവശ്യമായ അളവിൽ നടത്താനോ വാക്​സിൻ എല്ലാവർക്കും സമയബന്ധിതമായി നൽകാനോ സർക്കാറിന് സാധിച്ചിട്ടില്ല. ഇക്കാരണത്താൽ കോവിഡ് ബാധിതരുടെ എണ്ണം ക്രമാതീതമായി വർധിക്കുകയും മരണനിരക്ക് ഉയരുകയും ചെയ്യുകയാണ്. ഇക്കാര്യത്തിൽ അടിയന്തര നടപടികൾ സ്വീകരിക്കണമെന്ന് ആർ.എം.പി.ഐ സംസ്ഥാന സെക്രട്ടറി എൻ.വേണു ആവശ്യപ്പെട്ടു.