'നിലാവ്' പദ്ധതിയിൽ വിവേചനമെന്ന്​; യോഗം ബഹിഷ്​കരിച്ച്​ എൽ.ഡി.എഫ്

'നിലാവ്' പദ്ധതിയിൽ വിവേചനമെന്ന്​; യോഗം ബഹിഷ്​കരിച്ച്​ എൽ.ഡി.എഫ് പടം..nilavu33.jpg ആയഞ്ചേരി പഞ്ചായത്തിൽ നിലാവ് പദ്ധതിയിൽ തെരുവു വിളക്കുകൾ അനുവദിച്ചതിൽ വിവേചനം നടത്തിയെന്നാരോപിച്ച് പ്രതിപക്ഷ അംഗങ്ങൾ ഭരണസമിതി യോഗം ബഹിഷ്​കരിച്ച്​ സമരം നടത്തുന്നു ആയഞ്ചേരി: കേരള സർക്കാറും വൈദ്യുതി ബോർഡും കേരളത്തിലെ മുഴുവൻ ഗ്രാമങ്ങളിലും തെരുവു വിളക്കുകൾ സ്ഥാപിക്കുന്നതിനുവേണ്ടി നടപ്പാക്കുന്ന 'നിലാവ്' പദ്ധതി ആയഞ്ചേരി ഗ്രാമപഞ്ചായത്തിൽ പാർട്ടി അടിസ്ഥാനത്തിൽ സ്ഥാപിക്കാൻ ഭരണസമിതി എടുത്ത തീരുമാനത്തിനെതിരെ എൽ.ഡി.എഫ് അംഗങ്ങൾ ഭരണസമിതി യോഗം ബഹിഷ്​കരിച്ച് ഇറങ്ങിപ്പോയി. ഗ്രാമപഞ്ചായത്തിൽ ആകെ 500 തെരുവു വിളക്കുകൾ സ്ഥാപിക്കുന്നതിനാണ് കെ.എസ്.ഇ.ബിയുമായി കരാർ ഉണ്ടാക്കിയത്. ഇതിൽ എൽ.ഡി.എഫ് അംഗങ്ങൾ വിജയിച്ച വാർഡുകളിൽ 15 വീതവും ഭരണകക്ഷിയായ യു.ഡി.എഫ് അംഗങ്ങളുടെ വാർഡുകളിൽ 31 വീതവും അവശേഷിക്കുന്ന 85 എണ്ണം പഞ്ചായത്ത് പ്രസിഡൻറിന് തന്നിഷ്​ടപ്രകാരവും സ്ഥാപിക്കാനാണ് ഭൂരിപക്ഷ പ്രകാരം തീരുമാനമെടുത്തതെന്ന് എൽ.ഡി.എഫ് ആരോപിച്ചു.വിവേചന നടപടിക്കെതിരെ ബഹുജന പ്രക്ഷോഭത്തിന് രൂപംകൊടുക്കുമെന്ന് എൽ.ഡി.എഫ് അംഗങ്ങൾ അറിയിച്ചു. ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷൻ ടി.വി. കുഞ്ഞിരാമൻ മാസ്​റ്റർ, അംഗങ്ങളായ പി. രവീന്ദ്രൻ, ടി. സജിത്ത്, എൻ.പി. ശ്രീലത, ലിസ പുനയംകോട്ട്, സുധ സുരേഷ്, പ്രവിത അണിയോത്ത് തുടങ്ങിയവരാണ്​ യോഗം ബഹിഷ്​കരിച്ചത്​​.എന്നാൽ, നിലാവ് പദ്ധതി പ്രകാരം തെരുവു വിളക്കുകൾ അനുവദിക്കുന്നതിൽ ചില ഏറ്റക്കുറച്ചിലുകൾ ഉണ്ടായെന്നല്ലാതെ ഭരണപക്ഷ, പ്രതിപക്ഷ വിവേചനമുണ്ടായിട്ടില്ലെന്ന് ഗ്രാമപഞ്ചായത്ത് പ്രസിഡൻറ്​ കാട്ടിൽ മൊയ്തു മാസ്​റ്റർ അറിയിച്ചു. പ്രസിഡൻറിൻെറ അധികാരത്തിൽ നീക്കിവെച്ച 85 എണ്ണം ഇത്തരം പ്രശ്​നങ്ങൾ പരിഹരിക്കാൻ നീക്കിവെച്ചതാണെന്നും പ്രസിഡൻറ്​ പറഞ്ഞു.