വോട്ടെണ്ണാൻ ഒരുങ്ങി

വടകര: താലൂക്കിലെ മൂന്നു നിയമസഭ മണ്ഡലങ്ങളായ വടകര, നാദാപുരം, കുറ്റ്യാടി വോട്ടെണ്ണൽ നടക്കുന്നത് മടപ്പള്ളി ഗവ. ഗേൾസ് സ്കൂൾ, മടപ്പള്ളി കോളജ്, മേമുണ്ട സ്കൂൾ എന്നിവിടങ്ങളിലാണ്. വോട്ടെണ്ണൽ കേന്ദ്രങ്ങളിൽ തെരഞ്ഞെടുപ്പ് നിരീക്ഷക ഉമാദേവി ക്രമീകരണങ്ങൾ വിലയിരുത്തി. മടപ്പള്ളി ഗേൾസ് സ്കൂളിൽ പോസ്​റ്റൽ വോട്ടുകൾ 11 മേശകളിലായാണ് എണ്ണുന്നത്. വി.വിപാറ്റ് എണ്ണാൻ പ്രത്യേക സജ്ജീകരണം ഒരുക്കിയിട്ടുണ്ട്. വോട്ടെണ്ണൽ രണ്ടിടങ്ങളിലാണ് നടക്കുക. കോഴിക്കോട് മൂന്നിടങ്ങളിൽ സൂക്ഷിച്ച തപാൽവോട്ടുകൾ ശനിയാഴ്ച വൈകീട്ടോടെ രാഷ്​ട്രീയ പാർട്ടി പ്രതിനിധികളുടെ സാന്നിധ്യത്തിൽ വോട്ടെണ്ണൽ കേന്ദ്രങ്ങളിൽ എത്തിച്ചു. നാദാപുരം മണ്ഡലത്തിലെ പോസ്​റ്റൽ വോട്ടുകൾ കോഴിക്കോട് സഹകരണ ഭവനിലും വടകരയിലേത് കോഴിക്കോട് സിവിൽ സ്​റ്റേഷനിലും കുറ്റ്യാടിയിലേത് കോഴിക്കോട് പ്രിൻസിപ്പൽ അഗ്രികൾചറൽ ഓഫിസിലുമാണ് സൂക്ഷിച്ചിരുന്നത്. ഇലക്ട്രോണിക് വോട്ടുകൾ എണ്ണുന്നിടത്ത് നാല് പേരും തപാൽ വോട്ടുകൾ എണ്ണുന്നിടത്ത് മൂന്നുപേരുമാണ് ഉണ്ടാവുക. വോട്ടെണ്ണൽ കേന്ദ്രത്തിൽ എത്തുന്ന കൗണ്ടിങ് ഏജൻറുമാർ, ഉദ്യോഗസ്ഥർ, മാധ്യമപ്രവർത്തകർ എന്നിവർക്ക് കോവിഡ് പരിശോധന സർട്ടിഫിക്കറ്റ് ആവശ്യമാണ്.