കർണാടക സ്വദേശി തലക്കടിയേറ്റ്​ മരിച്ച നിലയിൽ ഒരാൾ കസ്റ്റഡിയിൽ

ഉദുമ: കോട്ടിക്കുളത്ത് കർണാടക സ്വദേശിയായ മധ്യവയസ്​കനെ തലക്കടിയേറ്റ്​ മരിച്ച നിലയിൽ കണ്ടെത്തി. മരിച്ചയാളുടെ പേരും വിലാസവും പൊലീസിന് ലഭ്യമായിട്ടില്ല. എന്നാൽ, കൊലനടത്തിയെന്നു കരുതുന്ന കോട്ടിക്കുളം സ്വദേശി ഉമേശനെ (35) ബേക്കൽ പൊലീസ് പാലക്കുന്നിൽനിന്ന്​ കസ്​റ്റഡിയിലെടുത്തു. ബുധനാഴ്ച രാത്രി 11 മണിയോടെയാണ് കൊലപാതകം നടന്നത്. വർഷങ്ങളായി പാലക്കുന്നിലും പരിസരങ്ങളിലും കണ്ടുവരുന്നയാളാണ് കൊല്ലപ്പെട്ട കർണാടക സ്വദേശി. കൂലിപ്പണിയുൾപ്പെടെ ചെയ്തുവരുന്ന മധ്യവയസ്കൻ കടത്തിണ്ണയിലും കോട്ടിക്കുളം റെയിൽവേ സ്​റ്റേഷനിലുമായാണ് രാത്രി അന്തിയുറങ്ങുന്നത്. വ്യാഴാഴ്ച പുലർച്ചെ കോട്ടിക്കുളം പള്ളിയിലേക്ക് പോയവരാണ് കോട്ടിക്കുളത്തെ കെ.എ. ട്രേഡേഴ്സ് എന്ന തേങ്ങ വ്യാപാര സ്ഥാപനത്തിനുമുന്നിൽ ഇയാളെ മരിച്ചുകിടക്കുന്നതായി കണ്ടത്. തുടർന്ന് ബേക്കൽ പൊലീസിൽ വിവരമറിയിക്കുകയായിരുന്നു. കൊലക്ക്​ ഉപയോഗിച്ചതെന്നു കരുതുന്ന ബലമുള്ളതും നീളം കൂടിയതുമായ മരപ്പലക മൃതദേഹം കിടന്നിരുന്ന കടക്കു സമീപത്തുനിന്ന്​ പൊലീസ് കസ്​റ്റഡിയിലെടുത്തു. ഡോഗ് സ്‌ക്വാഡും വിരലടയാള വിദഗ്ധരും സ്ഥലത്തെത്തി തെളിവു ശേഖരിച്ചു. ബേക്കൽ ഡിവൈ.എസ്.പി കെ.എ. ബിജുവും പൊലീസ് ഇൻസ്പെക്ടർ രതീഷും സ്ഥലത്തെത്തി അന്വേഷണം നടത്തി. മൃതദേഹം വിദഗ്ധ പോസ്​റ്റ്​മോർട്ടത്തിനായി പരിയാരത്തെ ഗവ. കണ്ണൂർ മെഡിക്കൽ കോളജിലേക്ക്​ മാറ്റി.