പുഴയിൽ മുങ്ങിമരിച്ച മുഹമ്മദ്‌ അബ്​ദുള്ള ബാവയുടെ മയ്യിത്ത് ഖബറടക്കി

കൊടുവള്ളി: കരിയാത്തുംപാറ റിസർവോയറിൽ പാറക്കടവിൽ മുങ്ങിമരിച്ച ചാവിടിക്കുന്നുമ്മൽ മുഹമ്മദ്‌ അബ്​ദുള്ള ബാവ (14) യുടെ മയ്യിത്ത് ഖബറടക്കി. പിതാവിനും മാതാവിനും സഹോദരനുമൊപ്പമാണ് തിങ്കളാഴ്ച വൈകീട്ട് നാലരയോടെ മുഹമ്മദ്‌ അബ്​ദുള്ള ബാവ പാറക്കടവിലെത്തിയത്​. കൂടെ വെള്ളത്തിലിറങ്ങിയ കുട്ടികളെല്ലാം കരക്ക് കയറിയിട്ടും ബാവയെ കാണാത്തതിനെ തുടർന്ന് നടത്തിയ തിരച്ചിലിൽ മുങ്ങിയ നിലയിൽ കണ്ടെത്തുകയായിരുന്നു. താമരശ്ശേരി താലൂക്ക് ആശുപത്രിയിലും പിന്നീട് കോഴിക്കോട് മെഡിക്കൽ കോളജ് ആശുപത്രിയിലും എത്തിച്ചെങ്കിലും രക്ഷിക്കാനായില്ല. പടനിലം ഫെയ്സ് ഇൻറർനാഷനൽ സ്കൂൾ എട്ടാം ക്ലാസ് വിദ്യാർഥിയാണ്. ചൊവ്വാഴ്ച പോസ്​റ്റ്​മോർട്ടത്തിന് ശേഷം ഉച്ചക്ക്​ ഒന്നരയോടെ മയ്യിത്ത് വീട്ടിലെത്തിച്ചു. തുടർന്ന് പറമ്പത്ത് കാവ് പള്ളി ഖബർസ്ഥാനിൽ ഖബറടക്കി.