സിവില്‍ സ​ൈപ്ലസ്​ ഗോഡൗണിലെ തീപിടിത്തം: ബാക്കിയുള്ള ഉൽപന്നങ്ങളുടെ ഗുണനിലവാര പരിശോധന തുടങ്ങി

വടകര: ലോകനാര്‍കാവില്‍ പ്രവര്‍ത്തിക്കുന്ന സിവില്‍ സ​​ൈപ്ലസ് ഗോഡൗണില്‍ തീപിടിത്തം നടന്ന സാഹചര്യത്തില്‍, അവശേഷിക്കുന്ന ഭക്ഷ്യോല്‍പന്നങ്ങളുള്‍പ്പെടെയുള്ളവയുടെ ഗുണനിലവാര പരിശോധന തുടങ്ങി. ബുധനാഴ്ച പുലര്‍ച്ചെയായിരുന്നു തീപിടിത്തം. 85 ശതമാനം ഉല്‍പന്നങ്ങളും ഉപയോഗശൂന്യമായി. ലോകനാര്‍കാവില്‍ രണ്ടു ഗോഡൗണുകളാണ് സ​ൈപ്ലകോക്കുള്ളത്. ഒന്ന്, സബ്സിഡിയുള്ള സാധനങ്ങള്‍ സൂക്ഷിക്കുന്ന കേന്ദ്രവും മറ്റൊന്ന് സബ്സിഡിയില്ലാത്ത സാധനങ്ങള്‍ സൂക്ഷിക്കുന്നവയും. വ്യാഴാഴ്ച ഗോഡൗണിലെത്തിയ ക്വാളിറ്റി കണ്‍ട്രോള്‍ വിഭാഗം ജീവനക്കാരാണ് ഗുണനിലവാര പരിശോധന നടത്തുന്നത്. ബുധനാഴ്ച വൈകീട്ടുണ്ടായ കനത്ത മഴയും അവശേഷിക്കുന്നവ സംരക്ഷിക്കുന്നതിന്​ ചെറിയതോതില്‍ തിരിച്ചടിയായിരിക്കുകയാണ്. ബദല്‍ സംവിധാനം ഏര്‍പ്പെടുത്തിയില്ലെങ്കില്‍ വടകര താലൂക്കിലെ റേഷന്‍ വിതരണത്തെ ബാധിച്ചേക്കുമെന്നാണ് ഈ രംഗത്തുള്ളവര്‍ പറയുന്നത്. നശിച്ച ഉല്‍പന്നങ്ങള്‍ ജനുവരി മാസത്തെ കിറ്റ് കൂടി കണക്കിലെടുത്തുള്ളവയാണ്. നിലവില്‍ ഡിസംബര്‍ മാസത്തെ കിറ്റ് വിതരണം തന്നെ, പൂര്‍ണമായി നടന്നിട്ടില്ല. ഈ സാഹചര്യത്തില്‍ ജനുവരി മാസത്തെ റേഷന്‍ കിറ്റ് വിതരണവും അവതാളത്തിലാകുമെന്നാണ്​ സൂചന. ഇതിനുപുറമെ, സിവില്‍ സ​ൈപ്ലസിനു കീഴിലുള്ള മാവേലി, ലാഭം മാര്‍ക്കറ്റുകളിലേക്ക് ഉല്‍പന്നങ്ങളും ഈ ഗോഡൗണില്‍നിന്നാണ് വിതരണം ചെയ്യാറുള്ളത്. കോവിഡ് സാഹചര്യത്തില്‍ ബി.പി.എല്‍, എ.പി.എല്‍ വ്യത്യാസമില്ലാതെ കിറ്റിനെ ആശ്രയിക്കുന്നവര്‍ ഏറെയാണ്. നിലവിലുള്ള വിലയിരുത്തല്‍ പ്രകാരം ഒരു കോടി രൂപയുടെ ഉല്‍പന്നങ്ങള്‍ നശിച്ചതായാണ് വിലയിരുത്തല്‍. കണക്കുകള്‍ എടുത്തുവരുന്നേയുള്ളൂവെന്നും സമയമെടുക്കുമെന്നും സിവില്‍ സ​ൈപ്ലസ് അധികൃതര്‍ പറഞ്ഞു.