പ്രസ്​റ്റീജ്​ പബ്ലിക്​ സ്​കൂളിനുമുന്നിൽ ഇന്ന് രക്ഷിതാക്കളുടെ പ്രതിഷേധം

കോഴിക്കോട്​: പ​ട്ടേൽതാഴം പ്രസ്​റ്റീജ്​ പബ്ലിക്​ സ്​കൂൾ അധികൃതരുടെ തെറ്റായ നിലപാടുകൾക്കെതിരെ വിദ്യാർഥികളും രക്ഷിതാക്കളും ബുധനാഴ്​ച സ്​കൂളിന്​ മുന്നിൽ പ്രതിഷേധം സംഘടിപ്പിക്കുമെന്ന്​ സ്​കൂൾ പാരൻറ്​സ്​ അസോസിയേഷൻ ഭാരവാഹികൾ വാർത്തസമ്മേളനത്തിൽ അറിയിച്ചു. കോവിഡ്​ ദുരിതകാലത്ത്​ ഫീസ്​ അടച്ചില്ലെന്ന കാരണം പറഞ്ഞ് ​നിരവധി വിദ്യാർഥികളെയാണ്​ സ്​കൂൾ അധികൃതർ ഓൺലൈൻ ക്ലാസിൽ നിന്ന്​ പുറത്താക്കിയത്​. ക്ലാസ്​ ഓൺലൈനായാണ്​ നടക്കുന്നത്​ എന്നതിനാൽ ഫീസിൽ കുറവ്​ വരുത്തണമെന്നും രക്ഷിതാക്കൾ ആവശ്യപ്പെട്ടു. നിലവിൽ ആദ്യഗഡു ഫീസ് ​അടക്കുന്നവരോട്​ നിശ്ചിത ദിവസത്തിനുള്ളിൽതന്നെ അടുത്ത ഗഡുവും അടക്കണമെന്ന് ​ആവശ്യപ്പെടുന്നുണ്ട്​. സ്​കൂൾ അധികൃതരുടെ തെറ്റായ നിലപാടുകൾക്കെതിരെ ജില്ല കലക്​ടർ, ഡി.ഇ.ഒ, ബാലാവകാശ കമീഷൻ, മുഖ്യമന്ത്രി എന്നിവർക്ക് ​പരാതി നൽകിയിട്ടുണ്ട്​. യൂനുസ്​ ഹാനി, ഇർഷാദ്​, പി.വി. മുഹസിൻ, ജവാദ് ​എന്നിവർ വാർത്തസമ്മേളനത്തിൽ പ​ങ്കെടുത്തു.