ലീഗ് എം.എൽ.എയെയും കൂട്ടാളികളെയും ഉടൻ അറസ്​റ്റ് ചെയ്യണം -ഐ.എൻ.എൽ

കണ്ണൂർ: 130 കോടിയുടെ വൻ ജ്വല്ലറി തട്ടിപ്പ് നടത്തി ആയിരത്തോളം നിക്ഷേപകരെ വഞ്ചിച്ച കേസിൽ മുസ്‌ലിം ലീഗ് മഞ്ചേശ്വരം എം.എൽ.എ എം.സി. ഖമറുദ്ദീനെയും കൂട്ടുകച്ചവടക്കാരെയും ഉടൻ അറസ്​റ്റ് ചെയ്ത് നിക്ഷേപം നഷ്​ടപ്പെട്ടവർക്ക് അത് തിരിച്ചുനൽകാൻ പോംവഴി കാണണമെന്ന് ഐ.എൻ.എൽ സംസ്ഥാന ജനറൽ സെക്രട്ടറി കാസിം ഇരിക്കൂർ ആവശ്യപ്പെട്ടു. ജനങ്ങളുടെ പരാതിയെതുടർന്ന് പൊലീസ് ഏഴ് കേസുകൾ ഇതിനകം ഫയൽ ചെയ്തിട്ടുണ്ടെങ്കിലും കേരളം ഇതുവരെ കാണാത്ത ഈ വൻ തട്ടിപ്പുമായി ബന്ധപ്പെട്ട വാർത്തകൾ പ്രസിദ്ധീകരിക്കാൻ പോലും മാധ്യമങ്ങൾ തയാറാവാത്തത് യു.ഡി.എഫ് നേതാക്കളുടെ ഇടപെടൽ മൂലമാണ്. എം.എൽ.എ സ്ഥാനം രാജിവെക്കാനും പ്രവാസികൾ കഷ്​ടപ്പെട്ട് സമ്പാദിച്ച പണം തിരിച്ചുപിടിക്കാനും ജനകീയ പ്രക്ഷോഭം തുടങ്ങേണ്ടതുണ്ടെന്ന് കാസിം ഇരിക്കൂർ പ്രസ്താവനയിൽ പറഞ്ഞു.