മഴയിലും കാറ്റിലും പ്ലാവ് വീണ് വീട് തകര്‍ന്നു

പേരാമ്പ്ര: ചൊവ്വാഴ്ച രാത്രിയുണ്ടായ ശക്തമായ മഴയിലും കാറ്റിലും പ്ലാവ് വീണ് വീട് തകര്‍ന്നു. കായണ്ണ പഞ്ചായത്തിലെ മണികുലുക്കിയില്‍ പ്രദേശത്താണ് നിരവധി മരങ്ങള്‍ കടപുഴകി വീടിന് കേടുപാടും കൃഷിനാശവും സംഭവിച്ചത്. മണികുലുക്കിയില്‍ കേളോത്ത് സുധീഷി​ൻെറ വീടിനു മുകളിലേക്ക് പിന്‍വശത്തുള്ള പ്ലാവ് പൊട്ടിവീണ് ഓടുമേഞ്ഞ മേല്‍ക്കൂര ഭാഗികമായി തകര്‍ന്നു. പ്ലാത്തോട്ടത്തില്‍ മോളിയുടെ വീടിനോട് ചേര്‍ന്ന വിറകുപുര തെങ്ങു വീണ് തകര്‍ന്നു. മുയിപ്പോത്ത് സ്വദേശിയായ തുരുത്തിയില്‍ അച്യുതന്‍ നായരുടെ ഉടമസ്ഥതയിലുള്ള പറമ്പിലും നിരവധി പ്ലാവുകളും തെങ്ങ്, കമുക്​ എന്നിവയും കാറ്റില്‍ നശിച്ചു. സമീപത്തെ മിക്ക വീടുകളിലേയും കൃഷിയിടങ്ങളില്‍ വാഴ, മരച്ചീനി, മറ്റ് ഇടവിളകള്‍ എന്നിവ കാറ്റില്‍ നശിച്ചു. ആയിരക്കണക്കിന് രൂപയുടെ നഷ്​ടം കണക്കാക്കുന്നു.