കുപ്രസിദ്ധ മോഷ്​ടാവും കൂട്ടാളികളും അറസ്​റ്റിൽ

കോഴിക്കോട്: നിരവധി മോഷണക്കേസുകളിലെ പ്രതിയായ കണ്ണാടിക്കൽ ഷാജിയും കൂട്ടാളികളും അറസ്​റ്റിൽ. കണ്ണാടിക്കല്‍ വടക്കേവയൽ തോട്ടുകടവിൽ ഷാജി എന്ന കണ്ണാടിക്കൽ ഷാജി (40), കൂട്ടാളികളായ കായലം സ്വദേശി കുറ്റത്തേടത്ത്​ ടി.കെ. അബ്​ദുൽ കരീം (50), തിരൂർ മുത്തൂർ കോട്ടത്തറ പുക്കാറയിൽ പൂക്കോയ (44) ചേവായൂർ മേലേവാകേരി കെ.പി. ഫൈസല്‍ (38) എന്നിവരെയാണ് ടൗണ്‍ സി.ഐ എ. ഉമേഷി​ൻെറ നേതൃത്വത്തില്‍ എസ്‌.ഐ കെ.ടി. ബിജിത്തും സംഘവും പിടികൂടിയത്. തിങ്കളാഴ്​ച അർധരാത്രിയിൽ പട്രോളിങ്ങിനിടെ കല്ലായ് റോഡില്‍ യമുന ആര്‍ക്കേഡി​ൻെറ സമീപത്തുനിന്നാണ് ഷാജിയെ പിടികൂടിയത്. സംശയ സാഹചര്യത്തില്‍ കണ്ട ഷാജിയെ കസ്​റ്റഡിയിലെടുത്തതോടെ കൈവശമുള്ള വലിയ ചാക്കിൽ പുതുവസ്​ത്രങ്ങൾ കണ്ടെത്തുകയായിരുന്നു. ഇവ മോഷ്​ടിച്ചതാണെന്ന് ഷാജി പൊലീസിനോട് സമ്മതിച്ചു. കൂടുതല്‍ ചോദ്യം ചെയ്​തതോടെയാണ് മറ്റുപ്രതികള്‍ക്കും പങ്കുള്ളതായി പറഞ്ഞതും ഇവരെയും അറസ്​റ്റുചെയ്​തതും. കഴിഞ്ഞയാഴ്​ച താജ്‌റോഡില്‍ ഉന്തുവണ്ടി കച്ചവടം നടത്തുന്നയാള്‍ വില്‍പനക്കായെത്തിച്ച പുതുവസ്ത്രങ്ങള്‍ കാണാതായിരുന്നു. സംഭവത്തില്‍ കേസ് രജിസ്​റ്റര്‍ ചെയ്​ത്​ അന്വേഷണം നടത്തവെയാണ്​ തൊണ്ടിമുതൽ സഹിതം പ്രതികൾ പിടിയിലായത്​. മോഷ്​ടിച്ച വസ്ത്രങ്ങള്‍ ലിങ്ക് റോഡിനു സമീപത്തെ ഒഴിഞ്ഞ കെട്ടിടത്തിലാണ്​ സൂക്ഷിച്ചത്. ഇവ മറ്റൊരാള്‍ക്ക് കൈമാറാൻ പുറത്തെടുത്തപ്പോഴാണ്​ പിടിയിലായത്​. നേരത്തേ ബൈക്ക്‌മോഷണമുള്‍പ്പെടെയുള്ള കേസുകളില്‍ അറസ്​റ്റിലായ ഷാജി ഒന്നരമാസം മുമ്പാണ്​ ജയിൽശിക്ഷ കഴിഞ്ഞ്​ പുറ​ത്തിറങ്ങിയത്​. അന്തർ സംസ്ഥാന തൊഴിലാളികളുടെയും രാത്രി റോഡരികില്‍ കിടന്നുറങ്ങുവന്നരുടെയും പക്കല്‍നിന്ന് പണവും മൊബൈല്‍ ഫോണും കവര്‍ച്ച നടത്തിയ സംഘത്തിലും ഷാജിയുണ്ടായിരുന്നുവെന്നാണ് പൊലീസ് പറയുന്നത്. ഇയാൾക്കെതിരെ കസബ പൊലീസിലും കവർച്ചക്കുൾപ്പെടെ കേസുണ്ട്​. നാലുപേരെയും കോടതി റിമാൻഡ്​ ചെയ്​തു.