കോവിഡ് വ്യാപന ഭീതി: ബാലുശ്ശേരി അതിജാഗ്രതയിൽ

ബാലുശ്ശേരി: കോവിഡ് വ്യാപനം വർധിക്കുന്ന​േതാടെ ബാലുശ്ശേരി അതിജാഗ്രതയിൽ. ബാലുശ്ശേരി പഞ്ചായത്തിനു തൊട്ടു നിലകൊള്ളുന്ന നന്മണ്ട, പനങ്ങാട്, ഉണ്ണികുളം, കോട്ടൂർ പഞ്ചായത്തുകളിൽ കോവിഡ് പോസിറ്റിവായവരുടെ എണ്ണം കൂടിയതോടെ ബാലുശ്ശേരി പ്രദേശം ആശങ്കയിലായിരിക്കുകയാണ്. പനങ്ങാട് കഴിഞ്ഞ ദിവസം രണ്ടു പേർക്ക് കോവിഡ് സ്ഥിരീകരിച്ചതിനാൽ അറപ്പീടിക, കരയത്തൊടി വാർഡുകൾ കണ്ടെയ്ൻമൻെറ്​ വാർഡുകളാക്കിയിട്ടുണ്ട്. ചൊവ്വാഴ്​ച 17ാം വാർഡിൽപെട്ട കൊട്ടാരമുക്കിലെ 20കാരനും കോവിഡ്​ സ്ഥിരീകരിച്ചിട്ടുണ്ട്. മെഡിക്കൽ കോളജ്​ ആശുപത്രിയിൽ ചികിത്സയിൽ കഴിഞ്ഞിരുന്ന പിതാവിനൊപ്പം നിന്ന യുവാവ് വീട്ടിലെത്തി ക്വാറൻറീനിൽ കഴിയുകയായിരുന്നു. ഇന്നലെ നടന്ന ടെസ്​റ്റിലാണ് കോവിഡ് സ്ഥിരീകരിച്ചത്. അറപ്പീടികയിലെ ഓട്ടോ ഡ്രൈവർക്ക് കോവിഡ് സ്ഥിരീകരിച്ചതോടെ ബാലുശ്ശേരി, അറപ്പീടിക പ്രദേശങ്ങളും കോവിഡ് സമ്പർക്കഭീതിയിലാണ്. 38ഓളം പേർ ഇയാളുടെ പ്രാഥമിക സമ്പർക്ക പട്ടികയിലുണ്ട്​. കൂടാതെ ദ്വിതീയ സമ്പർക്ക പട്ടികയിൽ 100ലധികം പേരുമുണ്ട്. ബാലുശ്ശേരിമുക്ക്, അറപ്പീടിക ഭാഗങ്ങളിലെ കടകളിലുള്ളവർക്കെല്ലാം ഏഴിന്​ ആൻറിജൻ ടെസ്​റ്റ്​ നടത്തുന്നുണ്ട്. നന്മണ്ടയിൽ കോവിഡ് സ്ഥിരീകരിച്ച ആരോഗ്യ പ്രവർത്തക ബാലുശ്ശേരി മുക്കിലും മറ്റും വന്നാണ് കോഴിക്കോട്ടെ ജോലിസ്ഥലത്തേക്ക് പോയിരുന്നത്. ഇവരുടെ പ്രാഥമിക സമ്പർക്ക പട്ടികയിൽ വന്ന 12 പേരുടെയും ആൻറിജൻ ടെസ്​റ്റ്​ ഫലം നെഗറ്റിവാണ്. ഒരാഴ്ചക്കുള്ളിൽ ഉണ്ണികുളത്ത് ആറു പേർക്ക് കോവിഡ് സ്ഥിരീകരിച്ചിട്ടുണ്ട്. ചൊവ്വാഴ്​ച ഉണ്ണികുളത്ത് രണ്ടു​ സ്ത്രീകൾക്കുകൂടി കോവിഡ് സ്ഥിരീകരിച്ചു. കോട്ടൂർ, ഉള്ള്യേരി പ്രദേശങ്ങളിലും കോവിഡ് പോസിറ്റിവ് സ്ഥിരീകരിച്ചവരുണ്ട്. ബാലുശ്ശേരിമുക്ക്, അറപ്പീടിക, നിർമല്ലൂർ ഭാഗങ്ങളിലെ മെഡിക്കൽ ഷാേപ് ഒഴികെയുള്ള കടകളെല്ലാം അടച്ചിട്ടിരിക്കുകയാണ്. കോവിഡ് സമൂഹവ്യാപന ആശങ്കകൾ തടയാൻ പ്രതിരോധ പ്രവർത്തനങ്ങൾ ഊർജിതമാക്കിയിട്ടുണ്ട്. പൊലീസ്, റവന്യൂ, ആരോഗ്യ വകുപ്പ്​ അധികൃതർ അതിജാഗ്രതയോടെയാണ് രംഗത്തുള്ളത്. ബാലുശ്ശേരിക്ക്​ ചുറ്റും കോവിഡ് ഭീതി നിലനിൽക്കുന്നുണ്ടെങ്കിലും ടൗണിലെ തിരക്കിന് ഇപ്പോഴും കുറവില്ല. കോവിഡ് മാനദണ്ഡങ്ങൾ കാറ്റിൽ പറത്തിയാണ് ജനങ്ങളുടെ ഷോപ്പിങ്ങും യാത്രകളും.