മന്ത്രി ജലീലിനെതിരെയും തെളിവുതേടി അന്വേഷണസംഘം

തിരുവനന്തപുരം: മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം. ശിവശങ്കറിന് പുറമെ മന്ത്രി കെ.ടി. ജലീലിനും സ്വർണക്കടത്ത് സംഘാംഗങ്ങളുമായി ബന്ധമുണ്ടോയെന്നതിന് തെളിവുകൾ തേടി അന്വേഷണസംഘം. ഉന്നതവിദ്യാഭ്യാസമന്ത്രി കെ.ടി. ജലീലിന് കീഴിലുള്ള സി-ആപ്​റ്റ്​ എന്ന സ്ഥാപനത്തിൽ വ്യാഴാഴ്ച കസ്​റ്റംസ് നടത്തിയ പരിശോധന അതിലേക്കാണ് വിരൽചൂണ്ടുന്നത്. മന്ത്രി ജലീൽ സ്വർണക്കടത്ത് കേസിലെ പ്രതിയായ സ്വപ്ന സുരേഷുമായി ഒമ്പതുതവണ ഫോണിൽ വിളിച്ചതി​ൻെറ വിശദാംശങ്ങൾ കസ്​റ്റംസിന് ലഭിച്ചിരുന്നു. അതിനുപുറമെ മന്ത്രിയുടെ പേഴ്സനൽ സ്​റ്റാഫ് സ്വപ്നയും മറ്റൊരു പ്രതിയായ സരിത്തുമായും സംസാരിച്ച വിവരങ്ങളും ലഭിച്ചു. ത​ൻെറ മണ്ഡലത്തിൽ റമദാൻ കിറ്റ് വിതരണവുമായി ബന്ധപ്പെട്ട് യു.എ.ഇ കോൺസുലേറ്റി​ൻെറ നിർദേശാനുസരണമാണ് സ്വപ്നയെ വിളിച്ചതെന്നായിരുന്നു മന്ത്രിയുടെ വിശദീകരണം. എന്നാൽ, ഇത്​ അന്വേഷണസംഘം വിശ്വസിച്ചിട്ടില്ലെന്നാണ് വ്യക്തമാകുന്നത്. മന്ത്രി ചട്ടലംഘനം നടത്തിയെന്ന റിപ്പോർട്ട്​ കേന്ദ്ര രഹസ്യാന്വേഷണവിഭാഗം നേരത്തേതന്നെ കേന്ദ്രത്തിന് സമർപ്പിച്ചിരുന്നു. നയതന്ത്ര സ്ഥാപന പ്രതിനിധികളും സ്ഥാപനങ്ങളുമായി സംസ്ഥാന മന്ത്രിമാർ ഇടപെടുന്നത് സംബന്ധിച്ച് വിദേശകാര്യ മന്ത്രാലയത്തി​ൻെറ കൃത്യമായ മാർഗനിർദേശമുണ്ട്. മന്ത്രി ജലീൽ അത് ലംഘിച്ചെന്നായിരുന്നു കേന്ദ്ര രഹസ്യാന്വേഷണവിഭാഗത്തി​ൻെറ റിപ്പോർട്ട്. അതിനുപുറമെ സംസ്ഥാന സർക്കാർ യു.എ.ഇ കോൺസുലേറ്റുമായി അതിരുവിട്ട ബന്ധം സ്ഥാപിച്ചിരുന്നതായും ചൂണ്ടിക്കാണിക്കപ്പെട്ടു. ഇക്കാര്യങ്ങളെല്ലാം വിദേശമന്ത്രാലയവും പരിശോധിക്കുകയാണ്. അതിനിടയിലാണ് ഇപ്പോൾ സി -ആപ്​റ്റിലെ കസ്​റ്റംസ് പരിശോധന. റിലീഫ് കിറ്റിനൊപ്പം മതഗ്രന്ഥങ്ങളും വിതരണം ചെയ്​തെന്നവിവരമാണ് അന്വേഷണസംഘത്തിന്​ മുന്നിലുള്ളത്. അതിനാൽതന്നെ ഇതിന് മറ്റ് മാനങ്ങൾ നൽകിക്കൊണ്ടുള്ള അന്വേഷണത്തിലേക്ക് എൻ.ഐ.എ ഉൾപ്പെടെ നീങ്ങാനുള്ള സാധ്യതയുണ്ട്. അങ്ങനെ സംഭവിച്ചാൽ അത് മന്ത്രി ജലീലിനും കുരുക്കാകും. മന്ത്രിയുടെ ഭൂതകാലം ഉൾപ്പെടെ ചൂണ്ടിക്കാട്ടിയുള്ള പ്രചാരണമാണ് ഫോൺ വിളി വിശദാംശങ്ങൾ പുറത്തുവന്നപ്പോൾ ചില ദേശീയമാധ്യമങ്ങൾ നടത്തിയത്. സ്വന്തം ലേഖകൻ