കോഴിക്കോട്​ കലക്​ടർക്ക്​ ഇനി പരാതി വാട്​സ്​ആപ്​ വഴി അയക്കാം

കോഴിക്കോട്​: ജില്ല കലക്​ടർക്ക്​ ഇനി വാട്​സ്ആപ്പിലും പരാതി അയക്കാം. 8848622770 എന്ന നമ്പറിലേക്കാണ് പരാതികൾ അയക്കേണ്ടത്. pgcellkozhikode@gmail.com എന്ന മെയിൽ വിലാസത്തിലും പരാതി അയക്കാം. പി.ഡി.എഫ്​ ആയോ, ഫോട്ടോ ആയോ മെസേജ് ആയോ പരാതി അയക്കാം. പരിഗണനയർഹിക്കുന്ന പരാതിക്കാരെ കലക്​ടർ നേരിട്ട് വിളിക്കും. ജില്ലയിൽ ഫലപ്രദവും ജനസൗഹൃദവുമായ ഭരണം ഉറപ്പാക്കുന്നതി​ൻെറ ഭാഗമാണ്​ നടപടി. പൗര കേന്ദ്രീകൃതമായി, വേഗത്തിലും കാര്യക്ഷമമായും ജനങ്ങൾക്ക് സേവനങ്ങൾ ഉറപ്പുവരുത്താൻ നടപ്പാക്കിയ വിവിധ പരിശ്രമങ്ങൾക്ക് മികച്ച പിന്തുണയാണ് എല്ലാവരും നൽകിയിട്ടുള്ളതെന്ന്​ കലക്​ടർ ഫേസ്​ബുക്കിൽ പറഞ്ഞു. ജനങ്ങളുടെ പ്രശ്നങ്ങൾ നേരിട്ട് മനസ്സിലാക്കി ത്വരിതഗതിയിൽ പരിഹാരങ്ങൾ സാധ്യമാക്കാനും, പഞ്ചായത്തുകളിൽ ദീർഘനാളായി നില നിൽക്കുന്ന വികസന പ്രശ്നങ്ങൾക്ക്​ പരിഹാരം കാണാനും പഞ്ചായത്ത് തലത്തിൽ സംഘടിപ്പിക്കുന്ന 'ഒപ്പം' അദാലത്തുകളിലൂടെ സാധിച്ചു. വിവിധ ഓഫിസുകളിൽ സിറ്റിസൺ ഹെൽപ് ഡെസ്ക് ഒരുക്കുന്നതിലൂടെയും, ജില്ല കലക്ടർ നടത്തുന്ന മുഖ്യമന്ത്രിയുടെ താലൂക്ക് തല പൊതുജന പരാതി പരിഹാര അദാലത്തിലൂടെയും പൊതുജനങ്ങളുടെ പ്രശ്നങ്ങൾക്ക് പെ​െട്ടന്നുതന്നെ പരിഹാരം കാണാനും മികച്ച പൗരാനുഭവം സാധ്യമാക്കാനും നിരന്തരം പരിശ്രമിച്ചുകൊണ്ടേയിരിക്കുകയാണ്. 'ഇമ്മടെ കോയിക്കോട്' പദ്ധതിയുടെ ഭാഗമായി വിവര സാങ്കേതിക വിദ്യയുടെ സാധ്യതകളെ പരമാവധി പ്രയോജനപ്പെടുത്തി പൊതുജനങ്ങൾക്ക് മികവാർന്ന സേവനം ഉറപ്പാക്കുന്നുണ്ട്​. പൊതുജനങ്ങൾക്ക് സമയനഷ്​ടമില്ലാതെ, ദുർബല വിഭാഗങ്ങൾക്ക് അവരുടെ വീടി​ൻെറ സുരക്ഷിതത്വത്തിൽ നിന്നും പരാതികൾ സമർപ്പിക്കാനുള്ള സംവിധാനം ഒരുക്കുകയാണ്​ പുതിയ രീതിയിലൂടെ.