നഗരസഭയിലെ കെട്ടിടനമ്പർ തട്ടിപ്പ്:​ അന്വേഷണ ഉദ്യോഗസ്ഥനെ​ സ്ഥലംമാറ്റി

കോഴിക്കോട്​: നഗരസഭയിലെ കെട്ടിടനമ്പർ തട്ടിപ്പ്​ കേസുകൾ അന്വേഷിക്കുന്ന ഉദ്യോഗസ്ഥന്​ സ്ഥലംമാറ്റം. കേസന്വേഷണം പുരോഗമിക്കവെ ജില്ല ക്രൈം​​ബ്രാഞ്ച്​ അസി. കമീഷണർ അനിൽ ശ്രീനിവാസനെയാണ്​ സ്ഥലംമാറ്റിയത്​. തിരുവനന്തപുരം പൊലീസ്​ ട്രെയിനിങ്​ സെന്‍ററിലേക്കാണ്​ മാറ്റം. ഇടുക്കി ക്രൈം​​​ബ്രാഞ്ച്​ ഡി​വൈ.എസ്​.പി ടി.എ. ആന്‍റണിയാണ്​ പകരമെത്തുന്നത്​. നഗരസഭയിലെ കെട്ടിടനമ്പർ തട്ടിപ്പുമായി ബന്ധപ്പെട്ട കേസുകൾ ലോക്കൽ പൊലീസാണ്​ രജിസ്റ്റർ ചെയ്തത്​. തുടർന്ന്​ തട്ടിപ്പിന്‍റെ വ്യാപ്തി പുറത്തുവന്നതോടെ സിറ്റി പൊലീസ്​ മേധാവി എ. അക്​ബറാണ്​ അന്വേഷണം ജില്ല ​ക്രൈം​ബ്രാഞ്ചിന്​ വിട്ടത്​. കേസിൽ ഡിജിറ്റൽ തെളിവുകളടക്കം ശേഖരിച്ചുവരുന്നതിനിടെയാണ്​ ​അന്വേഷണ ഉദ്യോഗസ്ഥനെ​ മാറ്റിയത്​. മാത്രമല്ല, ഇദ്ദേഹംതന്നെയാണ്​ ഏറെ കോളിളക്കമുണ്ടാക്കിയ സമാന്തര ടെലിഫോൺ എക്സ്​ചേഞ്ച്​ കേസുകളും അന്വേഷിക്കുന്നത്​. ഈ കേസിൽ ഒളിവിലുള്ള നാലു​പേർക്കായി ഇപ്പോഴും​ അന്വേഷണം തുടരുകയാണ്​​. ഖജനാവിന്​ നഷ്ടമുണ്ടാക്കുന്നതരത്തിൽ നഗരത്തിൽ ഏഴിടത്ത്​ പ്രവർത്തിച്ച സമാന്തര ​ടെലിഫോൺ എക്സ്​ചേഞ്ചുകൾ ഒരുവർഷം മുമ്പാണ്​ കണ്ടെത്തിയത്​​. അസി. കമീഷണറുടെ സ്ഥലംമാറ്റം രണ്ട്​ കേസുകളുടെയും അന്വേഷണത്തിന്​ തിരിച്ചടിയാവുമെന്ന്​ വിവിധ കോണുകളിൽനിന്ന്​ വിമർശനമുയർന്നിട്ടുണ്ട്​.