ഡി.വൈ.എഫ്.ഐ ജാഥക്ക് നരിക്കുനിയിൽ ഉജ്ജ്വല സ്വീകരണം

നരിക്കുനി: എന്റെ ഇന്ത്യ, എവിടെ ജോലി, എവിടെ ജനാധിപത്യം എന്ന മുദ്രാവാക്യമുയർത്തി സ്വാതന്ത്ര്യ ദിനത്തിൽ ഡി.വൈ.എഫ്.ഐ സംഘടിപ്പിക്കുന്ന ഫ്രീഡം സ്‌ട്രീറ്റ് പരിപാടിയുടെ ഭാഗമായി ഡി.വൈ.എഫ്.ഐ സംസ്ഥാന പ്രസിഡൻറ് വി. വസീഫ് നയിക്കുന്ന ജാഥക്ക് നരിക്കുനിയിൽ ഉജ്ജ്വല സ്വീകരണം നൽകി. സി.പി.എം ജില്ല സെക്രട്ടേറിയറ്റ് അംഗം മാമ്പറ്റ ശ്രീധരൻ, കക്കോടി ഏരിയ സെക്രട്ടറി കെ.എം. രാധാകൃഷ്ണൻ എന്നിവർ ചേർന്ന് ജാഥയെ സ്വീകരിച്ചു. വാദ്യഘോഷങ്ങളും കരിമരുന്ന് പ്രയോഗവും നൂറുകണക്കിന് പേർ ആകർഷണീയമായ ബാനറുകളും ശുഭ്രപതാകയും ഏന്തി ഉത്സവാന്തരീക്ഷത്തിലാണ് ജാഥയെ സ്വീകരിച്ചത്. സ്വീകരണ പൊതുയോഗത്തിൽ ഡി.വൈ.എഫ്.ഐ നരിക്കുനി ബ്ലോക്ക് പ്രസിഡൻറ് കെ.കെ. ഷിബിൻ ലാൽ അധ്യക്ഷത വഹിച്ചു. ജാഥാ ക്യാപ്റ്റൻ വി. വസീഫ്, ജാഥാ അംഗങ്ങളായ ആർ. രാഹുൽ, എം. വിജിൻ തുടങ്ങിയവർ സംസാരിച്ചു. ബ്ലോക്ക് സെക്രട്ടറി വി.കെ. വിവേക് സ്വാഗതവും ബ്ലോക്ക് ട്രഷറർ ഒ. അബ്ദുറഹ്മാൻ നന്ദിയും പറഞ്ഞു.