ഇന്ന്​ കെ.എസ്​.യു പ്രതിഷേധ ദിനം

കോഴിക്കോട്​: കൽപറ്റയിൽ രാഹുൽ ഗാന്ധിയുടെ ഓഫിസ്​ അടിച്ചുതകർത്ത എസ്​.എഫ്​.ഐയുടെ നടപടിക്കെതിരെ തിങ്കളാഴ്ച കാമ്പസുകളിൽ പ്രതിഷേധ ദിനമാചരിക്കുമെന്ന്​ ​കെ.എസ്​.യു സംസ്ഥാന പ്രസിഡന്റ്​ കെ.എം. അഭിജിത്ത്​ വാർത്ത സമ്മേളനത്തിൽ അറിയിച്ചു​. ബഫർസോൺ വിഷയത്തിൽ മോദി​ക്കെതിരെ പ്രതികരിക്കാതെ രാഹുൽ ഗാന്ധിയെ ലക്ഷ്യമിടുന്നത്​ ആർ.എസ്​.എസിന്​ വിടുപണി ​ചെയ്യലാണ്​. പിണറായി വിജയൻ കൂടി അറിഞ്ഞിട്ടാണ്​ ആക്രമണം. ​പൊലീസ്​ അടിമപ്പണി ചെയ്യുകയാണെന്നും അഭിജിത്ത്​ ആരോപിച്ചു. വിദ്യാർഥി, യുവജന സംഘടനയിലുള്ളവർ ലഹരി ഉപയോഗിക്കുന്നുവെന്ന മന്ത്രി എം.വി. ഗോവിന്ദ​ന്‍റെ പ്രതികരണം അനുഭവത്തിൽ നിന്നുള്ളതാകാമെന്നും എസ്​.എഫ്​.ഐയെയും ഡി.വൈ.എഫ്​.ഐയെയും അടുത്തറിയുന്ന ആളാണ്​ എം.വി. ഗോവിന്ദനെന്നും കെ.എസ്​.യു പ്രസിഡന്റ്​ പറഞ്ഞു. സർവകലാശാലകൾക്ക്​ വിദൂര വിദ്യാഭ്യാസം വിലക്കിയ നടപടി പിൻവലിക്കണമെന്നും പ്ലസ്​ വണിന്​ ആവശ്യത്തിന്​ സീറ്റുകൾ അനുവദിക്കണമെന്നും അദ്ദേഹം ആവശ്യപ്പെട്ടു. കേസെടുത്തത്​ പ്രവർത്തകരെ ശാന്തരാക്കിയതിന്​-അഭിജിത്ത്​ കോഴിക്കോട്​: കൽപ്പറ്റയിൽ യു.ഡി.എഫ്​ പ്രതിഷേധ പ്രകടനത്തിനിടെ ദേശാഭിമാനി ബ്യൂറോയിലേക്ക്​ കല്ലെറിഞ്ഞെന്ന്​ ആരോപിച്ച്​ തനിക്കെതിരെ എടുത്തത്​ കള്ളക്കേസാണെന്ന്​ ​കെ.എസ്​.യു സംസ്ഥാന പ്രസിഡന്റ്​ കെ.എം. അഭിജിത്ത്​. പ്രവർത്തകരെ ശാന്തരാക്കിയതിനാണ്​ തന്നെയും പ്രതിയാക്കിയത്​. ആരാണ്​ കല്ലെറിഞ്ഞതെന്ന്​ പരിശോധിക്കണം. തികച്ചും ​വൈകാരികമായ പ്രതിഷേധ പ്രകടനത്തിനിടെ ചില പ്രവർത്തകർ പലയിടങ്ങളിലേക്കും ഓടിയപ്പോൾ പിന്തിരിപ്പിക്കാൻ പോയതാണ്​. അവർ മുദ്രാവാക്യം വിളിക്കുകയാണ്​ ചെയ്തത്​. ഈ സംഭവത്തിൽ എന്തെങ്കിലും ബന്ധമുണ്ടെങ്കിൽ രാഷ്​ട്രീയ പ്രവർത്തനം അവസാനിപ്പിക്കുമെന്നും കെ.എസ്​.യു പ്രസിഡന്റ്​ പറഞ്ഞു.