പന്തൽ വാടക നൽകിയില്ല; പലിശസഹിതം നൽകാൻ ഉത്തരവ്

നാദാപുരം: ഗൃഹപ്രവേശനത്തിന് ഒരുക്കിയ പന്തൽ വാടക പലിശസഹിതം നൽകാൻ കോടതി ഉത്തരവ്. കാവിലുംപാറ മൊയിലാേത്തറയിലെ വടക്കേതിൽ പി.കെ. സാബുവിനോടാണ് വാടക തുകയായ 1,36,839 രൂപ പന്തൽ ഉടമയായ ഫ്രൻറ്സ് വാണിമേലിന് നൽകാൻ ഉത്തരവായത്. 2019 മുതലുള്ള ഒമ്പത് ശതമാനം പലിശയും നൽകണമെന്നാണ് നാദാപുരം മുനിസിഫ് കോടതി ഉത്തരവിട്ടത്. 2019ലായിരുന്നു കേസിനാസ്പദമായ സംഭവം. സാബുവിന്റെ ഗൃഹപ്രവേശനത്തിന് ആവശ്യമായ പന്തലും മറ്റ് സൗകര്യങ്ങളും ഒരുക്കിക്കൊടുത്ത വകയിൽ വാടക നൽകാത്തതിനെ തുടർന്നാണ് ഫ്രന്റ്സ് സൗണ്ട് സർവിസ് ഉടമ കെ.കെ. അശ്റഫ് കോടതിയെ സമീപിച്ചത്. വാദിഭാഗത്തിന് വേണ്ടി അഡ്വക്കറ്റ് പി. ബാലഗോപാൽ ഹാജരായി.