ബഷീർ ഫെസ്റ്റ് ജൂലൈ രണ്ടു മുതൽ

കോഴിക്കോട്​: വൈക്കം മുഹമ്മദ് ബഷീറിന്റെ 28ാം ചരമവാർഷികദിനത്തോടനുബന്ധിച്ച് 'നമ്മൾ ബേപ്പൂരി'ന്‍റെ ആഭിമുഖ്യത്തിൽ ജൂലൈ രണ്ടു മുതൽ അഞ്ചു വരെ ബഷീർ ഫെസ്റ്റ് സംഘടിപ്പിക്കുമെന്ന്​ മന്ത്രി പി.എ. മുഹമ്മദ്‌ റിയാസ് വാർത്തസമ്മേളനത്തിൽ അറിയിച്ചു. ബഷീർ ചിത്രരചന മത്സരം, ഫോട്ടോ പ്രദർശനം, നാടൻ ഭക്ഷ്യമേള, നാടകം, ഗസൽസന്ധ്യ തുടങ്ങി വിപുലമായ പരിപാടികളാണ് ഫെസ്റ്റിനോടനുബന്ധിച്ച് സംഘടിപ്പിക്കുന്നത്. ടൂറിസം മന്ത്രി രക്ഷാധികാരിയായ സംഘാടക സമിതിയിൽ മേയർ ഡോ. ബീന ഫിലിപ്പ് ചെയർപേഴ്സനാകും. ചലച്ചിത്ര സംഗീത ലളിതകലാ ഫോക്‌ലോർ സാഹിത്യ അക്കാദമികളുടെ സഹകരണത്തോടെയായിരിക്കും പരിപാടി. മേയർ ഡോ. ബീന ഫിലിപ്പ്, രാജീവ്‌, എം. ഗിരീഷ്, കെ.ആർ. പ്രമോദ്, ടി. രാധാഗോപി എന്നിവരും വാർത്തസമ്മേളനത്തിൽ പങ്കെടുത്തു.