കേന്ദ്ര സർവകലാശാല: അധ്യാപിക പ്രധാനമന്ത്രിക്ക്​ നൽകിയ പരാതി തീർപ്പാക്കി റിപ്പോർട്ട്​ നൽകണ​മെന്ന് ഹൈകോടതി

രവീന്ദ്രൻ രാവണേശ്വരം കാസർകോട്: കേന്ദ്ര സർവകലാശാലയിലെ അസോസിയറ്റ് പ്രഫസർ നിയമനത്തിനെതിരെ അധ്യാപിക പ്രധാനമന്ത്രിക്ക് നൽകിയ പരാതിയിൽ നടപടിയെടുക്കാൻ ഹൈകോടതി ആവശ്യപ്പെട്ടു. ഭാരതീയ വിചാരകേന്ദ്രം വൈസ് പ്രസിഡൻറും എയ്​ഡഡ്​ കോളജ്​ അധ്യാപകനുമായിരിക്കെ ഡെപ്യൂട്ടേഷനിലെത്തിയ ഡോ. കെ. ജയപ്രസാദി​ന്റെ നിയമനത്തിനെതിരെ കേന്ദ്ര വാഴ്​സിറ്റി അധ്യാപികയായിരുന്ന ഡോ. എസ്.ആർ. ജിത നൽകിയ പരാതിയിലാണ് ഹൈകോടതി ഇടപെടൽ. ജയപ്രസാദും ജിതയും അസോസിയറ്റ്​ പ്രഫസർ സ്​ഥാനത്തേക്ക്​ അഭിമുഖത്തിന് ഹാജരായിരുന്നു. എന്നാൽ, ഏറ്റവും കൂടുതൽ അക്കാദമിക്​ സ്​കോർ നേടിയ ജിതയെ നിയമിക്കാതെ രാഷ്​ട്രീയ സമ്മർദത്തിൽ ജയപ്രസാദിന് നിയമനം നൽകുകയായിരുന്നുവത്രെ. വാഴ്​സിറ്റിയിലെ സംഘ്പരിവാർ താൽപര്യങ്ങൾ സംരക്ഷിക്കാനാണിതെന്നാണ് ആരോപണം. 2014ലാണ് ജയപ്രസാദിന്​ ഡെപ്യൂ​ട്ടേഷനിൽ അസോസിയറ്റ് പ്രഫസർ സ്ഥാനത്തേക്ക് നിയമനം നൽകിയത്. എസ്​.ആർ. ജിതക്ക്​, അഭിമുഖത്തിൽ ഉണ്ടായിരിക്കേണ്ട മിനിമം അക്കാദമിക് പെർഫോമൻസ്​ ഇൻഡിക്കേറ്റേഴ്​സ്​ (എ.പി.ഐ​) സ്കോർ 300നും മുകളിലായിരുന്നു. അസോസിയറ്റ് പ്രഫസറാകണമെങ്കിൽ ഒരു പിഎച്ച്.ഡി വിദ്യാർഥിക്കെങ്കിലും ഗൈഡ് ആയിരിക്കണമെന്നും അന്തർദേശീയ പ്രസിദ്ധീകരണത്തിൽ ആർട്ടിക്കിൾ പ്രസിദ്ധപ്പെടുത്തണമെന്നും നിബന്ധനയുണ്ട്. ഇതൊന്നുമില്ലാത്ത ജയപ്രസാദി​ന്റെ സ്​കോർ 115ൽ താഴെയായിരുന്നു അഭിമുഖത്തിൽ ഉണ്ടായിരുന്നത്. അധ്യാപികക്ക് 310 ലഭിച്ചു. ബാഹ്യ ഇടപെടലിലൂടെ ജയപ്രസാദി​ന്റെ സ്​കോർ അധ്യാപികക്ക്​ മുകളിലാക്കി നിയമനം നൽകിയെന്നാണ്​ ആരോപണം. തുടർന്നാണ് പ്രധാനമന്ത്രിക്ക് പരാതി നൽകി ഹൈകോടതിയെ സമീപിച്ചത്​. മിനിമം സ്കോർ, ഇയാളുടെ നിയമനത്തിനെതിരെയുള്ള ഓഡിറ്റ് റിപ്പോർട്ട്, തുടർന്ന് മുൻകാല പ്രാബല്യത്തോടെ പ്രഫസർ പദവി നൽകിയത് തുടങ്ങിയ വിഷയങ്ങളെല്ലാം ഹൈകോടതിക്കു മുന്നിലെത്തി. വിഷയം വാഴ്​സിറ്റി തലത്തിൽ തീർപ്പാക്കി രണ്ടുമാസത്തിനകം ഹൈകോടതിക്ക്​ റിപ്പോർട്ട്​ നൽകണമെന്നാണ് നിർദേശം. അസോസിയറ്റ്​ പ്രഫസർ സ്​ഥാനത്ത്​ നിയമിച്ച ജയപ്രസാദ്​ പിന്നീട്​ പ്രഫസർ, ഡീൻ, പി.വി.സി തസ്​തികകളിൽ നിയമിക്കപ്പെട്ടു. യോഗ്യതകളെല്ലാം ചട്ടവിരുദ്ധമെന്ന്​ ഓഡിറ്റ്​ റിപ്പോർട്ടിലുണ്ടായിരുന്നു. കേന്ദ്ര വാഴ്​സിറ്റിയിൽ സംഘ്പരിവാർ കാര്യങ്ങളുടെ ചുമതലക്കാരനായാണ്​ ജയപ്രസാദിനെ എത്തിച്ചത്​. പിന്നീട്​ പരിവാറിനും വിനയാകുന്ന നടപടികളിലേക്കാണ്​ കാര്യങ്ങൾ എത്തിയത്​.