സ്വിഫ്​റ്റ്​ സ്ലീപ്പർ വരുമോ, ഇല്ലയോ?

കോഴിക്കോട്​: കെ.എസ്​.ആർ.ടി.സിയു​ടെ സ്വിഫ്​റ്റ്​ ബസിൽ ബംഗളൂരുവിലേക്ക്​ നീണ്ടുനിവർന്നുകിടന്ന്​ പോകാൻ എത്ര കാത്തിരിക്കണം?. സിഫ്​റ്റ്​ സർവിസ്​ തുടങ്ങിയിട്ട്​ രണ്ട്​ മാസം കഴിഞ്ഞിട്ടും കോഴിക്കോടുനിന്ന്​ എ.സി സ്ലീപ്പർ ബസുകൾ തുടങ്ങാൻ കെ.എസ്​.ആർ.ടി.സി മടികാണിക്കുകയാണ്​. ഗജരാജ എന്ന പേരിലുള്ള സ്ലീപ്പർ സർവിസുകൾ ബംഗളൂരുവിലേക്കും ചെന്നൈയിലേക്കുമെല്ലാം ഓടുന്നുണ്ട്​. സ്വകാര്യ കോൺട്രാക്​ട്​ കാ​രേജ്​ ബസുകളേക്കാൾ കുറഞ്ഞ നിരക്കിലാണ്​ സ്വിഫ്​റ്റിന്‍റെ സർവിസുകൾ. ഇതിൽ തന്നെ സ്ലീപ്പർ സർവിസുകൾ യാത്രക്കാർക്ക്​ ഏറെ ഇഷ്ടപ്പെട്ടുകഴിഞ്ഞു. ബംഗളൂരുവിലേക്ക്​ ഏറ്റവും കൂടുതൽ സ്വകാര്യ കോൺട്രാക്​ട് കാ​രേജ്​ ബസുകൾ ഓടുന്നത്​ കോഴിക്കോട്​ നിന്നാണ്​. വൻതുകയാണ്​ ഈ ബസുകൾ ഈടാക്കുന്നത്​. തിരക്കുള്ളസമയത്തും ഉത്സവസീസണിലും നിരക്ക്​ കൂടും. നോൺ എ.സി ബസിൽ 2000 രൂപ വ​രെ വാങ്ങിയ അനുഭവമുണ്ട്​. സ്വിഫ്റ്റ്​ എ.സി സ്ലീപ്പർ ബസിൽ 1200 രൂപ​ മതിയാകും. ഇത്തരം 12 ബസുകൾ എല്ലാ രാത്രിയിലും ബംഗളൂരുവിലേക്ക്​ ഓടുന്നുണ്ട്​. ഇവയിലെല്ലാം സീറ്റ്​ നിറയെ യാത്രക്കാരുമുണ്ട്​. എന്നാൽ, മികച്ച സൗകര്യങ്ങളുള്ള സ്വിഫ്​റ്റിന്‍റെ ഗജരാജ സ്ലീപ്പറിൽ യാത്രചെയ്യാനുള്ള അവസരം കോഴിക്കോട്ടുകാർക്ക്​ നിഷേധിക്കുകയാണ്​. സംസ്ഥാനത്തുതന്നെ ഏറ്റവും കൂടുതൽ ബംഗളൂരു യാത്രക്കാരുള്ള കോഴിക്കോട്ട്​ സ്ലീപ്പർ തുടങ്ങാതിരിക്കുന്നത്​ സ്വകാര്യ ബസുകളെ സഹായിക്കാനാണെന്ന്​ വ്യക്​തമാണ്​. ലഗേജും യാത്രക്കൂലിയുമടക്കം ലക്ഷങ്ങളാണ്​ സ്വകാര്യ സർവിസുകാർ കൊയ്യുന്നത്​. കർണാടകയിലും കേരളത്തിലും ഉന്നതതല ബന്ധങ്ങളുള്ള സ്വകാര്യ ബസുകാരാണ്​ കോഴിക്കോടുനിന്ന്​ ബംഗളൂരുവിലേക്ക്​ സർവിസ്​ നടത്തുന്നത്​. ഏപ്രിലിൽ സ്വിഫ്​റ്റ്​ സർവിസ്​ സംസ്ഥാനത്ത്​ തുടങ്ങി​യപ്പോൾ നാല്​ എ.സി സിറ്റിങ്​ ബസായ ഗരുഡയും ഒരു നോൺ എ.സി ഡീലക്സുമാണ്​ കോഴിക്കോടിന്​ അനുവദിച്ചത്​. ​ഇവക്ക്​ മികച്ച കളക്ഷനുണ്ട്​. ബാക്കി ബസുകൾ ഉടനെത്തുമെന്നായിരുന്നു അധികൃതരുടെ വിശദീകരണം. കാത്തിരിപ്പ്​ വെറുതെയാണെന്നാണ്​ സ്ഥിരം യാത്രക്കാരുടെ പരാതി. ബംഗളൂരുവിലേക്ക്​ ആവശ്യത്തിന്​ ട്രെയിനില്ലാത്തതിനാലും സൗകര്യപ്രദമായ സ്ഥലങ്ങളിൽ ഇറങ്ങാമെന്നതിനാലും ബസുകളെയാണ്​ കോഴിക്കോടുനിന്ന്​ കൂടുതൽപേരും ആശ്രയിക്കുന്നത്​. രാത്രിയാണ്​ യാത്രക്കാർ കൂടുതലുള്ളതെങ്കിലും നിലവിലെ ഗരുഡ സ്വിഫ്​റ്റ്​ ബസുകളിൽ ഒരു ബസ്​ മാത്രമാണ്​ സൗകര്യപ്രദമായ സമയമായ രാത്രി 10 മണിക്കുള്ളത്​. രാവിലെ 8.30നും ഉച്ചക്ക്​ 12.00നും ഓടിക്കുന്നത്​ രാത്രിയിലേക്ക്​ മാറ്റാനും തയാറാകുന്നില്ല. തിരുവനന്തപുരത്തുനിന്ന്​ ഊട്ടിയിലേക്കും സ്വിഫ്​റ്റ്​ സർവിസുണ്ട്​. തമിഴ്​നാട്ടിലെ ചേരൻ ട്രാൻസ്​പോർട്ടടക്കമുള്ള ബസുകളാണ്​ കോഴിക്കോടുനിന്ന്​ ഊട്ടിക്ക്​ സർവിസ്​ നടത്തുന്നത്​. സർവിസ്​ വ്യാപിപ്പിച്ചാൽ മികച്ച കളക്ഷനുമായി സ്വിഫ്​റ്റിന്​ മുന്നേറാനാകുമെന്ന്​ യാത്രക്കാർ പറയുന്നു.