അന്ന്​ ചോരപൊടിഞ്ഞ്​ ഉമ്മൻ ചാണ്ടി; ഇന്ന്​ സുരക്ഷാകവചത്തിൽ പിണറായി

കണ്ണൂർ: കനത്ത സുരക്ഷാകവചത്തിൽ പിണറായി കടന്നുപോകു​മ്പോൾ മുഖത്ത്​ ചോരചിന്തിയ മുൻ മുഖ്യമന്ത്രി ഉമ്മൻ ചാണ്ടിയുണ്ട്​ കണ്ണൂരിന്‍റെ ഓർമയിൽ. പ്രതിപക്ഷ സംഘടനകളുടെ പ്രതി​ഷേധത്തെ തുടർന്നാണ്​ ഞായറാഴ്ച കണ്ണൂരിലെത്തിയ മുഖ്യമന്ത്രി പിണറായി വിജയന്​ പൊലീസ്​ പഴുതടച്ച സുരക്ഷയൊരുക്കിയത്​. പ്രതിഷേധക്കാർക്കെതിരെ കണ്ണൂരിൽ പൊലീസ്​ കർശന നടപടിയാണ് സ്വീകരിച്ചത്. സോളാർ കേസിൽ ആരോപണവിധേയനായ മുൻ മുഖ്യമന്ത്രി ഉമ്മൻ ചാണ്ടിക്ക്​ നേരെ 2013 ഒക്‌ടോബർ 27നായിരുന്നു കണ്ണൂർ ടൗണിൽ ആക്രമണം നടന്നത്​. ഉമ്മൻ ചാണ്ടി സഞ്ചരിച്ച കാറിന്​​ നേരെ പ്രതിഷേധക്കാർ കല്ലെറിയുകയായിരുന്നു​. കണ്ണൂർ പൊലീസ് മൈതാനിയിൽ നടന്ന സംസ്‌ഥാന പൊലീസ് കായികമേളയുടെ സമാപനച്ചടങ്ങ് ഉദ്​ഘാടനം ചെയ്യാനെത്തിയപ്പോഴാണ്​ ഉമ്മൻ ചാണ്ടിക്ക്​ നേരെ ആക്രമണം നടന്നത്​. കല്ലേറിൽ കാറിന്റെ ചില്ല് തകർന്ന് ഉമ്മൻ ചാണ്ടിയു​ടെ നെഞ്ചിനും മുഖത്തും പരിക്കേറ്റു. കാറിന്‍റെ ചില്ല്​ തകർന്ന്​ തുളച്ചുകയറിയ കല്ല് പതിച്ച്​ നെറ്റിയിൽ മുറിവേറ്റു. തുടർന്ന്​ രക്​തം പൊടിഞ്ഞ ​നെറ്റിയുമായാണ് ഉമ്മൻ ചാണ്ടി പൊലീസ്​ കായികമേള സമാപനച്ചടങ്ങിൽ പ​ങ്കെടുത്തത്​. സമാപനച്ചടങ്ങിന്​ ശേഷം കായികതാരങ്ങൾക്ക്​ ഒരുക്കിയ മെഡിക്കൽ സെന്‍ററിൽനിന്ന്​ പ്രാഥമിക ശുശ്രൂഷക്ക്​ വിധേയനായി. പിന്നീട്​ രണ്ട്​ ചടങ്ങുകളിൽ പ​ങ്കെടുത്ത​ശേഷമാണ്​ കണ്ണൂരിലെ സ്വകാര്യ ആശുപത്രിയിൽ ചികിത്സതേടിയത്​. മുഖ്യമന്ത്രി പ​ങ്കെടുത്ത പരിപാടിയിലേക്ക്​​ സി.പി.എമ്മിന്‍റെ അന്നത്തെ ജില്ല സെക്രട്ടറി പി. ജയരാജൻ, എം.വി. ജയരാജൻ, സി.പി.ഐ ജില്ല സെക്രട്ടറി സി. രവീന്ദ്രൻ എന്നിവരുടെ നേതൃത്വത്തിൽ നൂറോളം പ്രവർത്തകർ കരി​ങ്കൊടിയേന്തി പ്രകടനം നടത്തിയിരുന്നു. ഇവരെ പരിപാടി നടക്കുന്ന പൊലീസ്​ പരേഡ്​ ഗ്രൗണ്ടിലേക്ക്​ കടക്കാൻ അനുവദിക്കാതെ പൊലീസ്​ തടയുകയായിരുന്നു. സോളാർ കേസിൽ സരിതയുടെ വെളിപ്പെടുത്തലിന്‍റെ പശ്ചാത്തലത്തിൽ സി.പി.എം, ഡി.വൈ.എഫ്​.ഐ പ്രവർത്തകരുടെ നേതൃത്വത്തിലായിരുന്നു അന്ന്​ കേരളമാകെ പ്രതിഷേധം. കണ്ണൂരിൽ നടന്ന അക്രമസംഭവത്തിൽ പ്രതികൾക്ക് എതിരെ വധശ്രമത്തിനും ഗൂഢാലോചനക്കും കണ്ണൂർ ടൗൺ പൊലീസ്​ കേസെടുത്തിരുന്നു. കേസിൽ മൊത്തം 114 പ്രതികളാണുണ്ടായിരുന്നത്​. ഇതിന്‍റെ വിചാരണ ഇനിയും പൂർത്തിയായിട്ടില്ല. സ്വർണക്കടത്ത്​ കേസിലെ പ്രതിഷേധത്തെ തുടർന്ന്​ പിണറായിക്ക്​ പൊലീസ്​ സുരക്ഷ കർശനമാക്കിയതിനെ തുടർന്ന് ചടങ്ങുകളിൽ കറുത്ത മാസ്​കിന്​ വിലക്കേർപ്പെടുത്തിയതിനെ ഉമ്മൻ ചാണ്ടി കഴിഞ്ഞദിവസം വിമർശിച്ചിരുന്നു. കണ്ണൂരിൽ ഇടതുപക്ഷത്തിന്റെ വഴിവിട്ട പ്രതിഷേധമായിരുന്നു. എന്നിട്ടും സാധാരണയിൽ കവിഞ്ഞ ഒരു സുരക്ഷയും അന്ന്​ തനിക്ക്​ ഏർപ്പെടുത്തിയിട്ടില്ലെന്നുമായിരുന്നു ഉമ്മൻ ചാണ്ടിയുടെ പ്രതികരണം. -പി.വി. സനൽ കുമാർ പടം -ummanchandy injury -കണ്ണൂരിൽ കല്ലേറിൽ പരിക്കേറ്റ ഉമ്മൻ ചാണ്ടിയെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചപ്പോൾ (ഫയൽ ചി​ത്രം)