യു.കെ. അന്ത്രു ഹാജിയുടെ വിയോഗം കുണ്ടുതോടിന്റെ നഷ്​ടം

കുറ്റ്യാടി: മലയോര കുടിയേറ്റ ഗ്രാമമായ കുണ്ടുതോടിന്റെ ചരിത്രത്തിലിടം പിടിച്ച യു.കെ. അന്ത്രു ഹാജിയുടെ വിയോഗം പ്രദേശത്തിന് വലിയ നഷ്ടമാണെന്ന്​ സർവകക്ഷി യോഗം അനുസ്മരിച്ചു. പൊതുസമ്മതനായ അദ്ദേഹം കുണ്ടുതോടിന്റെ വളർച്ചയുടെ എല്ലാ രംഗങ്ങളിലും കൈയൊപ്പ്​ ചാർത്തിയിട്ടുണ്ട്​. ആദ്യനാളുകളിൽ നാട്ടിൽ നിലനിന്ന ദാരിദ്ര്യം തുടച്ചു നീക്കാൻ യത്നിച്ചു. സർക്കാർ സ്കൂൾ, പ്രാഥമികാരോഗ്യ കേന്ദ്രം, വായനശാല, ജുമാമസ്​ജിദ്​, ബസ് ​സ്​റ്റോപ്പ് തുടങ്ങിയവക്ക്​ വിവിധ സൗകര്യങ്ങൾ ഉണ്ടാക്കുന്നതിൽ അന്ത്രു ഹാജിയുടെ സംഭാവനകൾ വലുതായിരുന്നു. കുടിവെള്ള ക്ഷാമം പരിഹരിക്കാൻ സ്വന്തമായി കിണർ കുഴിച്ച്​ ജലവിതരണം ഏർപ്പെടുത്തി. നാട്ടുവൈദ്യൻ കൂടിയായിരുന്ന അദ്ദേഹം തീപ്പൊള്ളലിന് ഉൾപ്പെടെ​ സൗജന്യ ചികിത്സ നൽകിയിരുന്നു. രാഷ്​ട്രിയ പാർട്ടി പ്രവർത്തകർക്കു പോലും പറഞ്ഞു തീർക്കാൻ പറ്റാത്ത തർക്കങ്ങൾ അദ്ദേഹം മാന്യമായി പരിഹരിച്ചു. നാട്ടിൽ മതസൗഹാർദം പുലരണമെന്ന്​ അതിയായി ആഗ്രഹിച്ച അദ്ദേഹം അതിന്​ വിരുദ്ധമായ പ്രവർത്തനങ്ങൾ തുടക്കത്തിലേ പരിഹരിച്ചു. കുണ്ടുതോട്​ അങ്ങാടിയിൽ നടന്ന അനുശോചന യോഗത്തിൽ വാർഡ്​ മെംബർ എം.കെ. ബാബു അധ്യക്ഷത വഹിച്ചു. മൊയ്തു പൈക്കാടൻ, പഞ്ചായത്തംഗങ്ങളായ ഏലിക്കുട്ടി സ്കറിയ, പി.എം. മൊയ്തീൻകുഞ്ഞ്​, ജയ്​മോൻ ജോസഫ്​, കെ.പി. വാസു, സൂപ്പി മണക്കര, തോമസ്​ പൂതക്കുഴി, എഴുത്തുകാരൻ സി.കെ. ആശ്വസി, തോമസ്​ മാസ്റ്റർ, ബിജേഷ്​, പത്മനാഭൻ മഠത്തിൽ, എ.എം. ഹനീഫ, ഇബ്രാഹിം ഹാജി, എം.കെ. അഷ്​റഫ്​, ജോർജ് ​മാസ്റ്റർ, അഡ്വ. യു.വി. പ്രദീപ്​ കുമാർ, കെ.എൻ. സുനിൽ, അഹമ്മദ് ചീത്തപ്പാട്ട്​, പ്രശാന്ത്​ മാസ്റ്റർ, എം.എം. പ്രദീപൻ എന്നിവർ സംസാരിച്ചു.