എളമരം കടവ് പാലം ജങ്ഷനിൽ വീണ്ടും അപകടം

മാവൂർ: കഴിഞ്ഞദിവസം തുറന്നുനൽകിയ എളമരം കടവ് പാലത്തിന്റെ മാവൂർ ഭാഗത്തെ ജങ്ഷനിൽ വീണ്ടും അപകടം. ബുധനാഴ്ച രാവിലെ ഒമ്പതോടെയാണ് അപകടമുണ്ടായത്. മാവൂർ ഭാഗത്ത് താൽക്കാലിക ട്രാഫിക് സംവിധാനം ഒരുക്കിയിരുന്നെങ്കിലും വീണ്ടും അപകടം ഉണ്ടായതോടെ അസി. കമീഷണർ കുഞ്ഞുമോയിൻകുട്ടി സ്ഥലം സന്ദർശിച്ചു. ചൊവ്വാഴ്ച ഈ ഭാഗത്ത് മൂന്ന് അപകടങ്ങൾ സംഭവിച്ചിരുന്നു. ഈ അപകടങ്ങളിൽ കാര്യമായ പരിക്കൊന്നും ഉണ്ടായിരുന്നില്ല. ബുധനാഴ്ച രാവിലെ എടവണ്ണപ്പാറയിൽനിന്ന് വന്ന ആക്ടീവ സ്കൂട്ടറും കൂളിമാട് ഭാഗത്തുനിന്നുവന്ന ബുള്ളറ്റുമാണ് കൂട്ടിയിടിച്ചത്. സാരമായി പരിക്കേറ്റ യാത്രക്കാരെ ആശുപത്രിയിൽ പ്രവേശിപ്പിച്ചിട്ടുണ്ട്. പല ദിശയിൽ വാഹനങ്ങളെത്തുന്നതും പാലം മാവൂർ - കൂളിമാട് റോഡിൽ ചേരുന്നതുമായ ഭാഗത്ത് സുരക്ഷാസംവിധാനങ്ങൾ ഇല്ലാത്തതാണ് അപകടത്തിന് കാരണം.