ലൈഫ്​ പദ്ധതി: ജില്ലതല താക്കോൽദാനം

കോഴിക്കോട്​: ലൈഫ് പദ്ധതിയിൽ പൂർത്തീകരിച്ച വീടുകളുടെ ജില്ലതല താക്കോൽദാനം ജില്ല പഞ്ചായത്ത് വൈസ്​ പ്രസിഡന്‍റ്​ എം.പി. ശിവാനന്ദൻ നിർവഹിച്ചു. ജില്ല കലക്ടർ ഡോ. എൻ. തേജ് ലോഹിത് റെഡ്ഡി അധ്യക്ഷത വഹിച്ചു. ജില്ല പഞ്ചായത്ത് വികസന സ്റ്റാൻഡിങ് കമ്മിറ്റി ചെയർപേഴ്സൻ വി.പി. ജമീല, എൽ.എസ്​.ജി.ഡി ജോ. ഡയറക്ടർ ഡി. സാജു, ജി.എൻ.ആർ.ഇ.ജി.എസ്​ ജെ.പി.സി. മുഹമ്മദ്, ജില്ല പഞ്ചായത്ത് സെക്രട്ടറി ടി. അഹമ്മദ് കബീർ, ജില്ല പ്ലാനിങ് ഓഫിസർ മായ, പഞ്ചായത്ത് ഡെപ്യൂട്ടി ഡയറക്ടർ അബ്ദുൽ ലത്തീഫ് എന്നിവർ സംബന്ധിച്ചു. ലൈഫ് മിഷൻ ജില്ല കോഓഡിനേറ്റർ കെ.ജെ. ടോമി സ്വാഗതം പറഞ്ഞു. 100 ദിന കർമപരിപാടിയുടെ ഭാഗമായി ജില്ലയിൽ 1081 വീടുകൾ പൂർത്തീകരിച്ചിട്ടുണ്ട്. ഗ്രാമപഞ്ചായത്തുകളിൽ 682 വീടുകളും നഗരസഭകളിൽ 399 വീടുകളുമാണ് പൂർത്തീകരിച്ചത്. ഭവനനിർമാണത്തിനായി ലൈഫ് മിഷൻ ഗ്രാമ/ബ്ലോക്ക്/ജില്ല പഞ്ചായത്തുകളിൽനിന്നായി കുടുംബത്തിന് നാലു​ ലക്ഷം രൂപയാണ് അനുവദിച്ചത്.