കൊടുവള്ളിയിലെ കടകളിൽ ആരോഗ്യ വകുപ്പ് പരിശോധന നടത്തി

കൊടുവള്ളി: ഭക്ഷ്യവിഷബാധ തടയുന്നതിന് ഭക്ഷ്യ സുരക്ഷ പദ്ധതിയുടെ ഭാഗമായി കൊടുവള്ളി നഗരസഭ പരിധിയിലെ കടകളിൽ ആരോഗ്യ വകുപ്പിന്റെ നേതൃത്വത്തിൽ പരിശോധന നടത്തി. വിവിധ ഹോട്ടലുകൾ, കൂൾബാറുകൾ, ബേക്കറികൾ തുടങ്ങി ഭക്ഷണ സാധനങ്ങൾ വിൽപന നടത്തുന്ന സ്ഥാപനങ്ങളിലാണ് പരിശോധന നടത്തിയത്. പരിശോധനയിൽ വൃത്തിഹീനമായ ചുറ്റുപാടുകളിലും നഗരസഭ ലൈസൻസിന് വിരുദ്ധമായി പ്രവർത്തിക്കുന്നതുമായ സ്ഥാപനങ്ങൾക്ക് നോട്ടീസ് നൽകുകയും പിഴ ചുമത്തുകയും ചെയ്തു. പരിശോധനക്ക് നഗരസഭ ഹെൽത്ത് ഇൻസ്‍പെക്ടർ എൻ. ശശി, ജെ.എച്ച്.ഐ മാരായ പി. ശശികുമാർ, എം.കെ. സുസ്മിത, ആശാ തോമസ് എന്നിവർ നേതൃത്വം നൽകി. വരും ദിവസങ്ങളിലും ശക്തമായ പരിശോധനയും നിയമ നടപടികളും സ്വീകരിക്കുമെന്ന് ആരോഗ്യ വകുപ്പ് അറിയിച്ചു.