അൺഎയ്​ഡഡ്​ സ്കൂൾ അധ്യാപികമാരുടെ ദുരിതത്തിൽ ഇടപെടും -വനിത കമീഷൻ

കോഴിക്കോട്​: ജില്ലയിലെ ചില അൺ എയ്​ഡഡ്​ സ്കൂളുകളിൽ അധ്യാപികമാർ അനുഭവിക്കുന്ന ദുരിതങ്ങളിൽ ഇടപെടുമെന്ന്​ വനിത കമീഷൻ. ഈ സ്കൂളുകളിലെ അധ്യാപികമാർ പലതരത്തിലുള്ള ചൂഷണത്തിനിരയാകുന്നതായി വനിത കമീഷൻ ജില്ലതല സിറ്റിങ്ങിനുശേഷം അധ്യക്ഷ പി. സതീദേവി വാർത്തസമ്മേളനത്തിൽ പറഞ്ഞു. അധ്യാപികമാർക്ക്​ മതിയായ ആനുകൂല്യം ലഭിക്കുന്നില്ല. പരാതി​പ്പെട്ടാലും പരിഹാരമില്ലാത്ത അവസ്ഥയാണ്​. ഇതുസംബന്ധിച്ച്​ ഒരുകൂട്ടം അധ്യാപികമാർ കമീഷന്​ പരാതി നൽകിയിരുന്നു. വിദ്യാഭ്യാസ വകുപ്പുമായി കമീഷൻ ബന്ധപ്പെട്ടു. കാര്യമായി ഇടപെടാനോ അൺ എയ്​ഡഡ്​ സ്കൂളുകളിലെ ഇത്തരം സമീപനങ്ങളെ നിയന്ത്രിക്കാനോ കഴിയില്ലെന്നാണ്​ ലഭിച്ച മറുപടി. ഇവയുടെ പ്രവർത്തനങ്ങളിൽ നിയന്ത്രണം വേണമെന്നത്​ ആലോചിക്കാൻ വിദ്യാഭ്യാസ വകുപ്പിനോട്​ ആവശ്യപ്പെടും. അധ്യാപികമാരെ ചൂഷണം ചെയ്യുന്നത്​ വളരെ ഗുരുതരമായ വിഷയമാണ്​. ദിവസക്കൂലി അടിസ്ഥാനത്തിലാണ്​ പലരും ജോലി ചെയ്യുന്നത്​. കമീഷൻ ഗൗരവമായി ഇടപെടുമെന്നും സതീദേവി പറഞ്ഞു. സർക്കാർ സ്കൂളുകളിലടക്കം വനിതകൾക്ക്​ പരാതി പരിഹാരസമിതിയുണ്ടാക്കിയിട്ടില്ലെന്നും ​ശ്രദ്ധയിൽപെട്ടതായി വനിത കമീഷൻ അധ്യക്ഷ പറഞ്ഞു. കമീഷനിൽ പരാതി നൽകുന്ന സ്ത്രീകളുടെ മാനസിക ബുദ്ധിമുട്ടുകൾക്കും പരിഹാരം കാണാൻ ശ്രമിക്കും. ഭാര്യ-ഭർതൃ തർക്കവും അതിർത്തി തർക്കങ്ങളും വർധിക്കുകയാണ്​. 100 പരാതികളാണ്​ കലക്ടറേറ്റ്​ കോൺഫറൻസ്​ ഹാളിൽ നടന്ന സിറ്റിങ്ങിൽ പരിഹരിച്ചത്​. 53 എണ്ണം അടുത്ത സിറ്റി​ങ്ങിലേക്കു​ മാറ്റി. 40 എണ്ണം ഒത്തുതീർപ്പാക്കി. ഏഴു പരാതികൾ പൊലീസിനും മറ്റു ബന്ധപ്പെട്ട വകുപ്പുകൾക്കും കൈമാറി.