ബസിന്റെ ബാറ്ററികൾ മോഷണം പോയി

വടകര: ഓർക്കാട്ടേരി ഗവ. ആശുപത്രിക്കുസമീപം നിർത്തിയിട്ട സ്വകാര്യ ബസിന്റെ രണ്ടു ബാറ്ററികൾ മോഷണം പോയി. വടകര-ഓർക്കാട്ടേരി-കുന്നുമ്മക്കര-തലശ്ശേരി റൂട്ടിലോടുന്ന രചന ബസിന്റെ ബാറ്ററികളാണ് മോഷ്ടിച്ചത്. ബസ് ഓട്ടം പോവാൻ ഡ്രൈവറും കണ്ടക്ടറും വന്നപ്പോഴാണ് ബാറ്ററി നഷ്ടപ്പെട്ടത് അറിഞ്ഞത്. 30,000 രൂപയുടെ നഷ്ടം കണക്കാക്കുന്നു. എടച്ചേരി പൊലീസിൽ പരാതി നൽകി. ബസുകളുടെയും മറ്റും ബാറ്ററി മോഷണംപോകുന്നത് പതിവാകുന്നതായി പരാതിയുണ്ട്. വടകര ബസ് സ്റ്റാൻഡിൽ നിർത്തിയിട്ട ബസിൽനിന്ന് കഴിഞ്ഞ ദിവസം ബാറ്ററി മോഷണം പോയിരുന്നു. നടപടി സ്വീകരിക്കണമെന്ന് വടകര താലൂക്ക് ബസ് ഓപറേറ്റേഴ്‌സ് പ്രസിഡന്റ് വി.വി. പ്രസീത് കുമാർ, സെക്രട്ടറി കെ.കെ. ഗോപാലൻ നമ്പ്യാർ എന്നിവർ ആവശ്യപ്പെട്ടു.