സാമ്പത്തിക പ്രതിസന്ധി; കർഷകൻ തനിച്ച്​ നെല്ല്​ കൊയ്യുന്നു

വൈക്കം: വർഷങ്ങളായി തരിശായികിടന്ന രണ്ടേക്കർ നിലം കൃഷിയോഗ്യമാക്കി നെൽകൃഷി ചെയ്ത കർഷകൻ സാമ്പത്തിക പ്രതിസന്ധിയെ തുടർന്ന് തനിച്ച്​ നെല്ല്​ കൊയ്യുന്നു. തലയാഴം തോട്ടകം മൂന്നാംനമ്പർ ചെട്ടിക്കരി ബ്ലോക്കിൽ കൃഷിചെയ്ത വൈക്കം തോട്ടുവക്കം വടക്കേ ചെമ്മനത്തുകര പാലേത്ത് ചക്രപാണിയാണ്​ (84) തൊഴിലാളികളെ ഇറക്കി കൊയ്യിക്കാൻ പണമില്ലാത്തതിനാൽ തനിച്ച്​ നെല്ല് കൊയ്തെടുക്കുന്നത്.

ഏഴുവർഷമായി തരിശുകിടക്കുന്ന നിലം തലയാഴം കൃഷിഭവൻ അധികൃതരുടെയും പഞ്ചായത്തി​െൻറയും പിൻബലത്തോടെയാണ് ചക്രപാണി കൃഷിയോഗ്യമാക്കിയത്. പുല്ലും മറ്റും ദിവസങ്ങളോളമെടുത്താണ് വെട്ടിനീക്കിയത്. ഇതിനായി തൊഴിലാളികൾക്ക് കൂലി നൽകിയത് 50,000 രൂപയോളം കടം വാങ്ങിയാണ്. വിത്ത് വിതച്ചതും പറിച്ചുനട്ടതും വളമിട്ടതുമൊക്കെ ചക്രപാണി തന്നെ ചെയ്തതിനാൽ കൂലിച്ചെലവ്​ ഒഴിവായി.

കൊയ്യാറായപ്പോഴേക്കും സാമ്പത്തികമായി തകർന്ന ചക്രപാണിക്ക്​ തൊഴിലാളികളെ കൊയ്യാൻ വിളിക്കാൻ പറ്റാത്ത സ്ഥിതിയായി. കൊയ്ത്ത് യന്ത്രം താണുപോകുന്ന പാടത്ത് മറ്റൊന്നും ആലോചിക്കാതെ ഈ വയോധികൻ തനിച്ച്​ കൊയ്യാനാരംഭിച്ചു. ഏതാനും ദിവസങ്ങൾക്കകം നെല്ല് പൂർണമായി കൊയ്തെടുക്കാൻ കഴിയുമെന്ന ആത്മവിശ്വാസത്തിലാണ് ചക്രപാണി. നെൽകൃഷിക്ക്​ പുറമെ, കപ്പ, പച്ചക്കറി, വാഴ തുടങ്ങിയവയും ചക്രപാണി കൃഷിചെയ്യുന്നുണ്ട്.