വാഹനാപകടത്തിൽ പരിക്കേറ്റ യുവാവ് സഹായം തേടുന്നു

മുണ്ടക്കയം: വാഹനാപകടത്തിൽ ഗുരുതര പരിക്കേറ്റ് ചികിത്സയിൽ കഴിയുന്ന യുവാവ് സുമനസ്സുകളുടെ സഹായം തേടുന്നു. പുഞ്ചവയൽ കടമാൻതോട് പുളിക്കച്ചിറ സാജനാണ്​ (47) 10 മാസത്തിലേറെയായി ശരീരം തളർന്ന് ബുദ്ധിമുട്ട് അനുഭവിക്കുന്നത്. മേസ്തിരി ജോലിചെയ്ത് കുടുംബം പുലർത്തിയിരുന്ന സാജൻ കിടപ്പായതോടെ നിത്യവൃത്തിക്ക​ുപോലും പണമില്ലാതെ വിഷമിക്കുകയാണ് ഈ നിർധന കുടുംബം. 

കഴിഞ്ഞ സെപ്റ്റംബറിലാണ് സാജൻ അപകടത്തിൽപെടുന്നത്. ജോലി കഴിഞ്ഞ് മടങ്ങും വഴി ബൈക്ക്​ നിയന്ത്രണം തെറ്റി മറിയുകയായിരുന്നു. അപകടത്തിൽ തലക്ക്​ ക്ഷതമേറ്റു. മൂന്നുമാസത്തോളം കോട്ടയം മെഡിക്കൽ കോളജിലെ അത്യാഹിത വിഭാഗത്തിൽ ചികിത്സയിലായിരുന്നു. ശരീരത്തി​​െൻറ ഇടതുഭാഗത്തെ ചലനശേഷി നഷ്​ടപ്പെട്ടു. ഓർമക്കുറവും സംഭവിച്ചു. ചതവേറ്റ തലച്ചോറി​​െൻറ ഒരുഭാഗം അണുബാധയേൽക്കാതിരിക്കാൻ വയറ്റിൽ സൂക്ഷിച്ചിരിക്കുകയാണ്. ഇത് ശസ്ത്രക്രിയയിലൂടെ എടുത്തുവെച്ചാൽ മാത്രമേ  ആരോഗ്യനിലയിൽ മാറ്റമുണ്ടാവൂവെന്ന് ഡോക്ടർമാർ പറയുന്നു.

ബന്ധുക്കളുടെയും സുഹൃത്തുകളുടെയും സഹായംകൊണ്ടാണ് ഇതുവരെ ചികിത്സ നടന്നത്. സാജനെ പരിചരിക്കുന്നത് ഭാര്യ ബിന്ദുവാണ്. ഏവിയേഷൻ കോഴ്സ്​ പഠനത്തിനുചേർന്ന മൂത്തമകൻ സാം, പ്ലസ് ടു വിദ്യാർഥി സാ​േൻറാ, ഒമ്പതാം ക്ലാസ് വിദ്യാർഥി ഷി​േൻറാ എന്നിവരുടെ പഠനം മുടങ്ങുന്ന അവസ്ഥയാണ്. മരുന്നിനുമാത്രം ആഴ്ചയിൽ 2000 രൂപയോളം വേണം.

ഓപറേഷനും തുടർ ചികിത്സക്കും 20 ലക്ഷം രൂപ ചെലവുവരും. ഇതിന്​ സുമനസ്സുകളുടെ കാരുണ്യം തേടുകയാണ് ഈ കുടുംബം. പുഞ്ചവയൽ എസ്.ബി.ഐ ബ്രാഞ്ചിൽ സാജ​​െൻറ മകൻ സാം, പൊതുപ്രവർത്തകൻ അജു ഈപ്പൻ എന്നിവരുടെ പേരിൽ സംയുക്ത അക്കൗണ്ട്​ തുറന്നിട്ടുണ്ട്​. നമ്പർ: 39385272321, ഐ.എഫ്.എസ്.സി എസ്.ബി.ഐ.എൻ 00700429. ഫോൺ: 9446991723.