മുണ്ടക്കയം സ്രാമ്പിയിൽ പാറമടക്കെതിരെ ജനരോഷം ശക്തമാകുന്നു

മുണ്ടക്കയം: മുണ്ടക്കയം പഞ്ചായത്തിലെ സ്രാമ്പിയിൽ പുതുതായി ആരംഭിക്കുന്ന പാറമടക്കെതിരെ ജനരോഷം ശക്തമാകുന്നു. പഞ്ചായത്തിലെ 20, 21, മൂന്ന് വാർഡുകളിലെ ജനങ്ങളെ പാറമടയുടെ പ്രവർത്തനം ഗുരുതരമായി ബാധിക്കുമെന്നാരോപിച്ച് ശക്തമായ പ്രതിഷേധവുമായി പൊതുജനങ്ങൾ രംഗത്തെത്തിയിരിക്കുകയാണ്. പ്രതിഷേധത്തിന്‍റെ ആദ്യ ഘട്ടമായി ജനകീയ കൂട്ടായ്മ യോഗം ചേർന്നു. സ്രാമ്പി ക്ലബ് അങ്കണത്തിൽ ചേർന്ന കൂട്ടായ്മ പഞ്ചായത്ത് അംഗം ജയിംസ് മാത്യു അധ്യക്ഷത വഹിച്ചു.

ജില്ല പഞ്ചായത്തംഗം അഡ്വ. പി. ജീരാജ് സമ്മേളനം ഉദ്ഘാടനം ചെയ്തു. യോഗത്തിൽ മുണ്ടക്കയം ഗ്രാമപഞ്ചായത്ത് പ്രസിഡന്‍റ് സൂസമ്മ മാത്യു, ബ്ലോക്ക് പഞ്ചായത്ത് അംഗം റോസമ്മ ജോൺ, ഗ്രാമപഞ്ചായത്ത് അംഗങ്ങളായ റോയ് കപ്പിലുമാക്കൽ, ബോബി കെ. മാത്യു, പൊതുപ്രവർത്തകരായ കെ.എസ്, രാജു, സിജു കൈതമറ്റം, റെജി പുഞ്ചവയൽ തുടങ്ങിയവർ സംസാരിച്ചു.

വർഷങ്ങൾക്ക് മുമ്പ് ഇവിടെ പ്രവർത്തിച്ചിരുന്ന സ്വകാര്യ വ്യക്തിയുടെ പാറമട അടച്ചുപൂട്ടിയിരുന്നു. അന്ന് ഇവിടെ ഉരുൾപൊട്ടൽ അടക്കമുള്ള പ്രകൃതിദുരന്തങ്ങൾ ഉണ്ടായിരുന്നു. വീണ്ടും പാറമട തുറന്നാൽ മേഖലയിൽ പ്രകൃതി ദുരന്തങ്ങൾ ആവർത്തിക്കുമെന്നും നാട്ടുകാർ ചൂണ്ടിക്കാട്ടുന്നു. സ്രാമ്പിയിൽ തുടങ്ങാൻ പോകുന്ന പാറമടക്കെതിരെ പൊതുജനങ്ങളെ അണിനിരത്തി ശക്തമായ പ്രക്ഷോഭത്തിനാണ് നാട്ടുകാർ തയാറെടുക്കുന്നത്.