അടിപിടിക്കേസിൽ ഒരാൾ അറസ്റ്റിൽ

മണിമല: സുഹൃത്തുക്കളെ വടിവാൾ ഉപയോഗിച്ച് ആക്രമിക്കാന്‍ ശ്രമിച്ച കേസിൽ ഒരാളെ പൊലീസ് അറസ്റ്റ് ചെയ്തു. വാഴൂർ കന്നുക്കുഴി കടവന്നപ്പുഴ വീട്ടിൽ കെ.എസ്. രാജീവാണ് (38) പിടിയിലായത്. സുഹൃത്തുക്കളുമായി ചാമംപതാൽ ഷാപ്പിന് സമീപം മദ്യപിക്കുകയും ഇവർ തമ്മിൽ വാക്തര്‍ക്കം ഉണ്ടാകുകയും ചെയ്തു.

തുടർന്ന് രാജീവ് സ്ഥലത്തുനിന്ന് പോവുകയും വടിവാളുമായി തിരിച്ചെത്തി സുഹൃത്തുക്കളെ ആക്രമിക്കാൻ ശ്രമിക്കുകയുമായിരുന്നു. വിവരമറിഞ്ഞ് സ്ഥലത്തെത്തിയ പൊലീസ് സംഘം സാഹസികമായാണ് ഇയാളെ പിടികൂടിയത്. മണിമല സ്റ്റേഷനിൽ ഇയാൾക്ക് നിരവധി അടിപിടിക്കേസുകൾ നിലവിലുണ്ട്.

മണിമല എസ്.എച്ച്.ഒ ഷാജിമോൻ, എസ്.ഐ സുരേഷ്, എ.എസ്.ഐമാരായ റോബി ജെ. ജോസ്, സുനിൽകുമാർ, സി.പി.ഒമാരായ ടോമി, അജിത്, ശ്രീകുമാർ എന്നിവർ ചേർന്നാണ് ഇയാളെ അറസ്റ്റ് ചെയ്തത്. പ്രതിയെ കോടതിയിൽ ഹാജരാക്കി.